Mikitu Sasima asudzili na try miesiacy aryštu
Viadomaha lidera moładzievaha ruchu Mikitu Sasima asudzili na try miesiacy aryštu. Advakaty Sasima raniej patrabavali apraŭdalnaha prysudu.
12 traŭnia ŭ Baranavičach abviaścili prysud adnamu z aktyvistaŭ moładzievaha ruchu Mikitu Sasimu. Jaho pryznali vinavatym uva ŭchileńni ad vajskovaj słužby j pakarali aryštam na try miesiacy. Prysud vynies sudździa Kanstancin Čyrkun. Mikita Sasim znachodzicca pad vartaj z 16 sakavika. Takim čynam, na volu jon vyjdzie bolš jak praź miesiac.
Raniej u sudzie junak zajaŭlaŭ, što razhladaje praces jak pomstu za aktyŭnuju apazycyjnuju dziejnaść. Pačuć kamentar na prysud ad Sasima nie ŭdałosia – jaho adrazu vyvieli z sudovaj zali. Adnadumcy Mikity Sasima, jakija prysutničali na abviaščeńni prysudu, pierakanany ŭ palityčnych pryčynach pieraśledu.
Kaža Luboŭ Kučynskaja.
(Kučynskaja: ) «Mikita Sasim – lider moładzi. Jon raspačaŭ kampaniju Džyns, raspačaŭ dzień biełaruskaj salidarnaści. Tamu nie ličyć hety sud palityčnym niemahčyma».
Načalnik adździełu pryzyvu baranavickaha vajenkamatu Alaksandar Šościk adkidaje palityčnyja matyvy hetaj spravy. Pavodle jaho, u Baranavičach nie ŭpieršyniu ŭchilajucca ad vajskovaj słužby, i staŭleńnie da ŭsich adnolkavaje. Što Sasim śviadoma ŭchilaŭsia ad vajskovaj słužby, padpałkoŭnik nie sumniavajecca. Prykładam, u kastryčniku junak nie pryjšoŭ adpaviedna z pozvaj u vajenkamat, a potym samavolna pakinuŭ špital, kudy jaho nakiravała dla abśledavańnia medyčnaja kamisija.
Nahadajem: lehčy ŭ špital Mikitu Sasimu daviałosia nieŭzabavie paśla pieršaha Dnia biełaruskaj salidarnaści, jaki adznačaŭsia 16 vieraśnia. Padčas vuličnaj akcyi junak byŭ źbity milicyjantami j atrymaŭ traŭmu hałavy. U sudzie spadar Sasim pryznaŭ: jon na dva dni raniej źjechaŭ sa špitalu damoŭ. I patłumačyŭ svoj učynak: usie abśledavańni da taho času ŭžo byli zavieršany. U kryminalnaj spravie spadara Sasima, darečy, jość spravazdača daktaroŭ sa śviedčańniem, što patrebny kurs abśledavańnia pryzyŭnik prajšoŭ.
Na dumku advakataŭ, paćvierdžany byŭ tolki adzin fakt – niajaŭka Mikity Sasima ŭ vajenkamat. Ci dastatkova hetaha dla pryznańnia jaho kryminalnym złačyncam? Advakaty Alaksandar Halijeŭ i Zoja Haŭdziej hetak nia ličać, a tamu patrabavali apraŭdalnaha prysudu. Zoja Haŭdziej adznačyła fakt roznaha staŭleńnia ŭ Baranavičach da tych, chto ŭchilajecca ad słužby ŭ vojsku.
(Hardziej: ) «I sudu viadoma, i mnie – jak advakatu, jaki daŭno praktykuje, – što ŭ nas heta pieršy vypadak, kali pa takim artykule pryciahvajuć da kryminalnaj adkaznaści. U sudoch takich spraŭ nie było».
Mikita Sasim, jahonyja svajaki j abaroncy pakul nia vyznačylisia z tym, ci buduć abskardžvać prysud. Maci Mikity, Śviatłana Sasim, paviedamiła «Svabodzie», što ŭ aŭtorak pojdzie na spatkańnie z synam. Heta budzie dla jaje pieršaje dazvolenaje spatkańnie za dva miesiacy ŭtrymańnia Mikity pad vartaj.
I ŭsio ž: ci zabiaruć Mikitu Sasima ŭ vojska, kali jon adbudzie termin pakarańnia? Jak patłumačyli «Svabodzie» ŭ presavaj słužbie Ministerstva abarony, pavodle biełaruskaha zakonu, asob, pryznanych vinavatymi za kryminalnaje złačynstva, na terminovuju vajskovuju słužbu nie pryzyvajuć.