Nokia sprabuje viarnucca na rynak smartfonaŭ
Smartfon pad znakamitym finskim brendam Nokia byŭ prezientavany na štohadovaj Mižnarodnaj vystavie spažyvieckaj elektroniki ŭ Łas-Viehasie. Telefon Nokia 6, ź jakim finy chočuć advajavać stračanuju dolu rynku, pracuje pad kiravańniem apieracyjnaj sistemy Android 7.0. Hetaja madel budzie dastupnaja pakul tolki na kitajskim rynku, paźniej jana źjavicca ŭ inšych rehijonach.
Vyrablać telefony pad brendam Nokia buduć znoŭ finy. U pačatku 2000-ch Nokia była suśvietnym lidaram u vytvorčaści mabilnikaŭ. Ale sa źjaŭleniem iPhone i smartfonaŭ na Android finski hihant pačaŭ hublać svaje pazicyi i byŭ vymušany ŭ 2013 hodzie pradać Microsoft svoj biznes pa vytvorčaści telefonaŭ (kampanija Nokia praciahvała isnavać, ale jana vyrablała tolki telekamunikacyjnaje abstalavańnie).
Microsoft praktyčna admoviŭsia ad brenda Nokia i pradavaŭ svaje smartfony pad nazvaj Microsoft Lumia, a pad brendam Nokia pradavalisia tolki damb-fony (tannyja telefony z samymi bazavymi funkcyjami). Spravy ŭ Microsoft Mobile nie kleilisia, i ŭ siaredzinie 2016 hoda jany pradali biznes pa vytvorčaści tannych telefonaŭ z bazavymi funkcyjami pad brendam Nokia finskaj kampanii HMD Global, pakinuŭšy sabie tolki vytvorčaść smartfonaŭ Microsoft Lumia.
Spačatku HMD Global pad brendam Nokia vyrablała tolki damb-fony, ale ambicyi ŭ finaŭ byli vyšejšyja. Jany byli aryjentavanyja na vytvorčaść smartfonaŭ, i Nokia 6 — ich pieršaja sproba.
HMD Global farmalna źjaŭlajecca niezaležnaj kampanijaj, ale absalutna ŭvieś top-mieniedžmient HMD — byłyja supracoŭniki Nokia. Navat štab-kvatera HMD Global pad Chielsinki znachodzicca za niekalki mietraŭ ad hałoŭnaha ofisa Nokia. Vidavočna, što finskaja karparacyja vyrašyła stvaryć daččynuju kampaniju, kab viarnucca na rynak mabilnych telefonaŭ. Takim čynam finy sprabujuć vyratavać viadomy brend.
Niahledziačy na toje, što Nokia straciła svaju dolu rynku telefonaŭ, sam brend dahetul maje dobruju reputacyju i ŭsprymajecca pazityŭna va ŭsim śviecie.
Nie dziŭna, što Nokia vyrašyła viarnucca na rynak smartfonaŭ praz Kitaj. Na siońniašni dzień Padniabiesnaja maje samy vialiki rynak (kala 600 młn smartfonaŭ). Taksama kitajcy byli zaŭsiody samymi addanymi amatarami pradukcyi Nokia. U 2013 hodzie ŭ Kitai navat adbyvalisia akcyi pratestu suprać prodažu telefonnaha biznesu Nokia kampanii Microsoft.
Nokia 6 kaštuje kala 245 dalaraŭ, i pry hetym maje dobryja dla takoj cany charaktarystyki:
- 64 HB ubudavanaj pamiaci
- 4 HB apieratyŭnaj pamiaci
- vaśmijadzierny 64-bitny pracesar Qualcomm Snapdragon 430
- 5,5-calevy dyspłej z raspaznavańniem Full HD
- asnoŭnaja kamiera na 16 miehapiksielaŭ i frantalnaja kamiera dla sełfi na 8 miehapiksielaŭ.
Čakajecca, što Nokia pakaža jašče niekalki novych madelaŭ smartfonaŭ praź miesiac u Barsiełonie padčas Suśvietnaha mabilnaha kanhresu.