Łukašenka nazvaŭ «vyćciom i lamantam» zajavy rasijskaha boku ab piacidzionnym biaźvizavym režymie
Alaksandr Łukašenka zajaŭlaje ab adsutnaści ryzyk dla Biełarusi i sumiežnych krain ad uviadzieńnia Biełaruśsiu biaźvizavaha ŭjezdu na termin da piaci sutak dla hramadzian 80 dziaržaŭ, jakija prybyvajuć praz Nacyjanalny aeraport Minsk.
«Dakumient raspracoŭvaŭsia paŭtara hoda i byŭ staranna vyvierany usimi dziaržaŭnymi orhanami, u pieršuju čarhu z punktu hledžańnia ŭźniknieńnia jakich-niebudź ryzyk dla Biełarusi, našych sajuźnikaŭ i susiedziaŭ», — zajaviŭ kiraŭnik krainy.
Alaksandr Łukašenka źviarnuŭ uvahu na uźnikłuju z hetaj nahody ŭ ŚMI infarmacyjnuju kampaniju.
«Časam znajomišsia z zaŭvahami hetych aŭtaraŭ i dzivu daješsia. Heta ludzi, jakija nie razumiejuć sutnaści ci ž śpiecyjalna nahniatajuć abstanoŭku. Chutčej za ŭsio, śpiecyjalna.
Admiena viz nie aznačaje admieny pahraničnaha kantrolu. Jak jon byŭ, tak i jość, — skazaŭ kiraŭnik dziaržavy. - Ciabie abaviazkova pravierać, chto ty taki, dakładna tak, jak u Rasii - pašpart pradjaviŭ, kampjutar adznačyŭ. Narmalny čałaviek - prachodź, piać dzion žyvi ŭ Biełarusi. Nie — kampjutar adrazu pakaža».
«Tamu vyćcio i lamant z boku niekatorych sumiežnych dziaržaŭ — heta prosta sproba vykazać niezadavalnieńnie z boku peŭnych sił. My tut ničoha nie parušyli z punktu hledžańnia našaha ŭnutranaha zakanadaŭstva. Heta naša suvierennaje prava. I my nie parušyli ničoha ŭ płanie našych damoŭlenaściej ź inšymi dziaržavami », — padkreśliŭ biełaruski lidar.
«Usio, pra što my damaŭlalisia, my śviata vykonvajem. Kali Rasija kłapocicca, to ja zaŭsiody kažu: daj boh vam nieści na miažy słužbu tak jakasna, jak heta arhanizavana ŭ biełaruskich pamiežnych vojskach. Im jašče vielmi daloka da taho ŭzroŭniu kantrolu na miežach, jaki maje Biełaruś», — dadaŭ Alaksandr Łukašenka.
«Treba spakojna na heta reahavać i zajmacca svajoj spravaj. Zrazumieła, dla čaho heta robicca. Choć hety dakumient paŭtara hoda raspracoŭvaŭsia i ŭzhadniaŭsia z usimi našymi susiedziami, u tym liku z Rasijaj. Voś adkaz na ŭsie hetyja insinuacyi», — reziumavaŭ kiraŭnik krainy.