Biełaruś na niavyznačany termin praciahnuła dziejańnie taryfaŭ na tranzit nafty
Biełaruś na niavyznačany termin praciahnuła dziejańnie taryfaŭ na tranzit nafty pa svajoj terytoryi. Infarmacyja ab hetym utrymlivajecca ŭ pastanovie Ministerstva antymanapolnaha rehulavańnia i handlu № 6, apublikavanaj 21 studzienia na Nacyjanalnym pravavym internet-partale.
Pastanova MARH № 6 ad 18 studzienia 2017 hoda ŭnosić źmianieńnie ŭ pastanovu viedamstva № 48 ad 30 śniežnia 2016 hoda. Z raniejšaha dakumienta vyklučany punkt ab tym, što novyja taryfy buduć dziejničać pa 31 sakavika 2017 hoda.
Novaja pastanova nabyvaje moc 1 lutaha 2017 hoda.
5 studzienia Biełaruś pavysiła taryfy na pasłuhi pa transparciroŭcy nafty pa mahistralnych trubapravodach, raźmieščanych na terytoryi krainy. Taryfy na pasłuhi AAT «Połacktransnafta Družba» pa transparciroŭcy (tranzicie) nafty vyraśli na 11,76%, na pasłuhi AAT «Homieltransnafta Družba» — na 7,7%.
Raniej Biełaruś zapytvała pavyšeńnie taryfaŭ na transparciroŭku nafty z Rasii dla AAT «Homieltransnafta Družba» na 20,5%. «My paličyli nieabhruntavanym ich pavyšeńnie na 20,5%», — zajaviŭ u kancy śniežnia načalnik upraŭleńnia paliŭna-enierhietyčnaha kompleksu Fiederalnaj antymanapolnaj słužby Rasii Dźmitryj Machonin. U adpaviednaści ź mietodykaj, pavodle słoŭ Machonina, taryf budzie pavyšany na «inflacyja plus 3%, to bok 7,7%».
U svaju čarhu AAT «Połacktransnafta Družba» raniej pahadziłasia z prapanovaj rasijskaj «Tranśniefci» pavialičyć taryf na transparciroŭku nafty z RF na 11,76% u 2017 hodzie zamiest 20,5%.
Biełaruś i Rasija amal hod nie mohuć urehulavać naftahazavuju sprečku — pytańni koštu rasijskaha hazu i zahruzki syravinaj biełaruskich naftapierapracoŭčych zavodaŭ.
Na fonie naftahazavaj sprečki Biełaruś źbirałasia pavysić taryfy na tranzit rasijskaj nafty jašče ŭ kastryčniku 2016 hoda. Pryčym razhladałasia pavyšeńnie taryfaŭ u siarednim na 50%, adnak hetaha nie adbyłosia.