Historyja z «biełaruskimi hłobusami» atrymała praciah
Biełaruś nie vyrablaje hłobusy sama, a kab zamović partyju za miažoj finansavańnia niama. Sponsar, jaki ŭsio ž budzie hatovy padtrymać prajekt, pavinny budzie atrymać zhodu ad Dziaržkamitetu pa majomaści, taki adkaz atrymaŭ z «Biełkartahrafii» siabra ruchu «Za svabodu» Dźmitryj Šymanski.
U kramach jość tolki hłobusy, vyrablenyja dla rasijskaha rynku, a tam našaja kraina nazvanaja «Biełoruśsijej», Krym — rasijski, niama hłobusaŭ na biełaruskaj movie, na heta ŭ zvarocie da dyrektara pradpryjemstva «Biełkartahrafija» źviarnuŭ u śniežni 2016 hoda uvahu Dźmitryj Šymanski.
Našaje pradpryjemstva nie zajmajecca vytvorčaściu hłobusaŭ, abo ich pastaŭkami, pierad usim paviedamili ŭ pradpryjemstvie «Biełkartahrafija».
«Vytvorčaść hłobusaŭ — davoli składany zavadski praces, u Biełarusi adsutničaje baza pa vyrabie hłobusaŭ», — pryznaŭsia dyrektar «Biełkartahrafii» N.A. Vierzun, podpis jakoha staić pad adkazam Šymanskamu.
Pa dadzienych Vierzuna, «da niadaŭniaha času hłobusy, jakija traplali ŭ handlovuju sietku z-za miažy, zabiaśpiečvali patrabavańni ŭ hetym pradukcie, ab čym nielha kazać u sučasny momant». Zaraz nabyćcio hłobusaŭ u vučebnyja ŭstanovy nie finansujecca ź dziaržaŭnaha biudžetu, «nabyvajucca jany za ŭłasnyja srodki, abo sa srodkaŭ miascovaha biudžetu.
«Finansavańnie rabot pa vyrabie i pastaŭkach u Respubliku Biełaruś hłobusaŭ, jakija buduć adpaviadać patrebam biełaruskaha rynku, pavinna vyrašacca na dziaržaŭnym uzroŭni, niepasredna pry ŭdziele Ministerstva adukacyi i Dziaržaŭnaha kamiteta pa majomaści», — śćviardžajuć u «Biełkartahrafii».
Pradpryjemstva hatovaje «razhladzieć zvarot na pastaŭku hłobusaŭ i ich vyrab za miažoj za srodki i pa zakazie sponsaraŭ, z dazvołu Dziaržkamitetu pa majomaści».
Da taho, «Biełkartahrafija» adspravazdačyłasia, što vydaje karty i na biełaruskaj movie, i abiacała pavialičvać ich asartymient.
«Hety adkaz mianie nie zadavoliŭ, i ja płanuju abskardzić adkaz u vyšejšych instancyjach. U tym liku z tym, kab daviedacca pra košt partyi hłobusaŭ na biełaruskaj movie», — skazaŭ sajtu Pyx.by Dźmitryj Šymanski.