Podvojny jubilej: hurtu «Pałac» — 25, Alehu Chamienku — 50
4 krasavika ŭ brovary «Druźja» (Kulman, 40) — vialiki kancert «Pałaca». Pačatak a 19-j.
Lidar i adzin z zasnavalnikaŭ hurtu «Pałac» Aleh Chamienka ličyć, što 25 hadoŭ dla hrupy — heta zusim nie miaža.
«Kab razvažać pra toje, što značyć dla hurtu data ŭ 25 hod, napeŭna, treba ŭzvažvać u paraŭnańni. Kali paraŭnoŭvać z Rolling Stones, jakim u hetym hodzie z 55 — to vielmi mała. Siońnia mnie zdajecca, što luby muzyčny hurt musić spadziavacca na aktyŭnuju tvorčuju pracu nie mienš čym 30 hod», — ličyć Aleh Chamienka.
Haściam jubilejnaha kancerta hurt padrychtavaŭ siurpryzy. Tak, da prykładu, na kancert zaprošany ŭsie, chto tak ci inakš za 25 hadoŭ mieŭ dačynieńnie da tvorčaści «Pałaca».
Sa słoŭ muzykaŭ, da jubileju hurt padychodzić z chvalavańniem, ale nie biez notak honaru.
Hurt «Pałac» viadomy spałučeńniem fołku z sučasnymi muzyčnymi kirunkami i stvareńniem novaha stylu ŭ muzycy, fołk-madernu, na pačatku 90-ch.
Pieradhistoryja hurtu pačałasia ŭ 1987 hodzie, kali Aleh Chamienka viarnuŭsia z armii i paznajomiŭsia ź Juryjem Vydronkom, jaki i zaprasiŭ jaho ŭ paŭprafiesijny kalektyŭ. Hurt pačaŭ hrać chard-rokavuju prahramu, paralelna vystupajučy jak kavier-bend na viasiellach i pracujučy nad ułasnym materyjałam. Kali było napisana dastatkova aŭtarskich piesień, hurt pierajmienavaŭsia ŭ «Pałac» u 1992 hodzie.
Abjadnoŭvajučy narodnyja pieśni z sučasnym hučańniem, hurt znajšoŭ svoj, ułaścivy tolki jamu, paznavalny styl.
«Nam padavałasia, što kali b kultura Biełarusi nie źniščałasia savieckaj uładaj na praciahu 20-ha stahodździa, to biełaruskaja muzyka była b mienavita takoj, jak hrajem my. My bačyli, što kožny vybitny hurt u śviecie hraje ŭ svajoj, ułaścivaj tolki jamu stylistycy», — raspaviadaje Aleh Chamienka.
Pavinšavać «Pałac» z 25-cihodździem, a Aleha Chamienku z 50-hodździem možna budzie 4 krasavika ŭ brovary «Druźja». Pačatak a 19-j hadzinie, košt kvitkoŭ składaje ad 20 da 30 rubloŭ.