Sioleta na Dzień Voli mitynhu nie budzie
Na pieršym pasiadžeńni arhkamiteta pa praviadzieńni tradycyjnaj dla apazicyi akcyi «Dzień Voli», jakoje adbyłosia 31 studzienia ŭ Minsku, abmierkavanyja łozunhi ŭdzielnikaŭ vuličnaha šeścia.
Zajaŭku na praviadzieńnie 25 sakavika tradycyjnaj akcyi z nahody Dnia Voli 6 studzienia pieradali ŭ Minharvykankam pradstaŭniki čatyroch apazicyjnych struktur: ruchu «Za Svabodu» (Alaksandr Rusievič), arhkamiteta pa stvareńni partyi «Biełaruskaja chryścijanskaja demakratyja» (Dzianis Sadoŭski), Abjadnanaj hramadzianskaj partyi (Jahor Viniacki) i Partyi BNF (Dźmitryj Kaśpiarovič).
Na pasiadžeńni arhkamiteta było vyrašana, što łozunhami akcyi stanuć: «Dzień Voli — 2017», «Razam — za Niezaležnaść» i «Nie narod dla ŭrada, a ŭrad dla naroda». Pavodle słoŭ staršyni Partyi BNF Alaksieja Janukieviča, łozunhi pavinny «padkreślić nieabchodnaść kansalidacyi ŭsiaho biełaruskaha hramadstva na asnovie niezaležnaści, kab abaranić dziaržavu ad mahčymaj ahresii», a taksama adlustravać «sacyjalna-ekanamičny składnik akcyi».
«Tych, chto nie zhodny z sacyjalna-ekanamičnaj palitykaj, jakuju pravodzić ułada, my zaprašajem dałučycca da akcyi», — skazaŭ Janukievič.
Nastupnaje pasiadžeńnie arhkamiteta adbudziecca 7 lutaha. Lidar Partyi BNF zaznačyŭ, što na jaho zaprašajucca «ŭsie zacikaŭlenyja baki», kab «dasiahnuć maksimalnaj kansalidacyi demakratyčnych sił dla realizacyi sumiesnaha scenaryja akcyi».
U arhkamitet uvachodziać Partyja BNF, ruch «Za Svabodu», ruch salidarnaści «Razam», arhkamitet pa stvareńni partyi «Biełaruskaja chryścijanskaja demakratyja», Abjadnanaja hramadzianskaja partyja. Inicyjatary akcyi spadziajucca, što da arhkamiteta dałučacca inšyja demakratyčnyja struktury.
Arhanizatary akcyi prapanoŭvajuć Minharvykankamu dazvolić nastupny maršrut praviadzieńnia akcyi (z 14.00 da 15.30): zbor na placoŭcy kala budynka Nacyjanalnaj akademii navuk, šeście pa praśpiekcie Niezaležnaści da parku Janki Kupały. Mitynh nie płanujecca.
Dzień Voli štohod adznačajecca biełaruskaj apazicyjaj, jon prymierkavany da hadaviny abviaščeńnia niezaležnaści Biełaruskaj Narodnaj Respubliki ŭ 1918 hodzie.