Karpienka: My dumajem nad stvareńniem niezaležnaha ahienctva pa kantroli jakaści adukacyi
Ministerstva adukacyi razhladaje pytańnie stvareńnia niezaležnaha ahienctva kantrolu jakaści adukacyi, paviedamiŭ ministr adukacyi Ihar Karpienka žurnalistaŭ 1 lutaha pierad sumiesnym pasiadžeńniem kiraŭnictva Minadukacyi i kamisij Pałaty pradstaŭnikoŭ pa adukacyi, kultury i navucy i Savieta Respubliki pa adukacyi, navucy, kultury i sacyjalnym raźvićci.
Biełaruś u 2015 hodzie pryniali ŭ Bałonski praces z umovaj vykanańnia darožnaj karty madernizacyi adukacyi. Zhodna z hetym mižnarodnym dakumientam, da kanca 2017 hoda ŭ Biełarusi pavinna ź`iavicca pravavaja asnova dla stvareńnia niezaležnaha ahienctva kantrolu jakaści adukacyi ŭ adpaviednaści ź jeŭrapiejskimi standartami i instrukcyjami.
«My dumajem nad tym, u jakim heta budzie vyhladzie, — skazaŭ ministr. — U ciapierašni čas pastaŭlenaja zadača pa aptymizacyi dziaržaparatu. Heta značyć, što my pavinny acanić kolkaść supracoŭnikaŭ ministerstva i ich funkcyjanalnyja abaviazki. Heta značyć nie prosta biazdumna skaracić niejkuju kolkaść kadraŭ, a padumać, jak my pavinny pieraraźmierkavać».
«U vyniku niejkaja častka paŭnamoctvaŭ moža adyści da struktury, jakaja budzie zajmacca kantrolem jakaści, — skazaŭ ministr. — Mahčyma, my nadzielim bolšymi paŭnamoctvami Instytut kantrolu jakaści adukacyi».
Karpienka adznačyŭ, što ŭ cełym biełaruskaja sistema adukacyi «ŭpisvajecca ŭ darožnuju kartu».
«Nie skažu, što my ad čahości adstajem ci niešta robim niapravilna. Nam nichto nie stavić takija žorstkija miežy, što my pavinny ŭsio pad lakały zrabić, jak zrabili niedzie. My pavinny dziejničać u intaresach našaj sistemy adukacyi, u intaresach padrychtoŭki kadraŭ dla našaha realnaha siektara ekanomiki. Nichto nie suprać darožnaj karty, adzinaj prastory jeŭrapiejskaj vyšejšaj adukacyi, ale ŭ nas pavinny być svaje intaresy. my vyłučajem biudžetnyja srodki. Padrychtoŭka kadraŭ dla halin, jakija zapatrabavanyja, — heta svojeasablivaja dziaržaŭnaja zamova. I my majem prava prafiesijna pahladzieć na toje, jak usio heta arhanizavać, a nie prosta iści ŭ farvatary niejkich ustanovak, jakich, pa sutnaści, žorstkich i niama», — skazaŭ ministr.
Jon taksama adznačyŭ, što jakaść adukacyi zaležyć nie tolki ad ahienctva, a ad šmatlikich faktaraŭ, u tym liku ad taho, nakolki sistema adukacyi apieratyŭna reahuje na patrebu padrychtoŭki kadraŭ, nakolki aktyŭna pracuje z zamoŭcam. Karpienka pryvioŭ u prykład Biełaruski dziaržaŭny ŭniviersitet infarmatyki i radyjoelektroniki, dzie aktyŭna pracujuć z Parkam vysokich technałohij i inšymi zamoŭcami. Tak, u BDUIR u tym liku dziakujučy zamoŭcam kadraŭ stvoranaja sučasnaja materyjalna-techničnaja baza dla navučańnia studentaŭ.
Razam z tym u spravazdačy ab implemientacyi pałažeńniaŭ darožnaj karty, padrychtavanaj Hramadskim Bałonskim kamitetam i inšymi ekśpiertami pavodle vynikaŭ 2016 hoda, adznačajecca, što implemientacyja darožnaj karty ŭ Biełarusi źviedvaje sur`ioznuju ryzyku. Adznačajecca, što, naprykład, niama ruchu ŭ častcy pravavoj asnovy stvareńnia niezaležnaha ahienctva kantrolu jakaści adukacyi ŭ adpaviednaści ź jeŭrapiejskimi standartami, nie admienienaje i prymusovaje raźmierkavańnie.
Spravazdača apublikavanaja na sajcie Hramadskaha Bałonskaha kamiteta.