Ministr adukacyi: Nie vypuskać dzicia ŭ tualet — heta nienarmalna
Davajcie nie budziem raździmać temu, zajaviŭ žurnalistam ministr adukacyi Ihar Karpienka 1 lutaha pierad sumiesnym pasiadžeńniem kiraŭnictva Minadukacyi i kamisij Pałaty pradstaŭnikoŭ pa adukacyi, kultury i navucy i Savieta Respubliki pa adukacyi, navucy, kultury i sacyjalnym raźvićci.
Tak jon prakamientavaŭ incydent u adnoj ź minskich škoł: vaśmihadovamu chłopčyku nie dazvolili vyjści z kłasa padčas uroka, i jon abmačyŭsia. Mama chłopčyka raskazała ab tym, što zdaryłasia, žurnalistam.
Ministr adznačyŭ, što infarmacyja, raspaŭsiudžanaja ŭ ŚMI, «nie zusim adpaviadaje rečaisnaści», ale ŭ čym nieadpaviednaść, nie skazaŭ. Razam z tym jon adznačyŭ, što «nie vypuskać dzicia ŭ tualet — heta nienarmalna».
Karpienka vykazaŭ mierkavańnie, što niapravilna intymnyja padrabiaznaści vynosić na publiku. «Mamie treba było telefanavać nie ŭ hazietu, a pryjści ŭ škołu i razabracca ŭ hetych pytańniach. Treba razumieć, što baćki i nastaŭnik — ŭzajemaźviazanyja partniory ŭ adukacyjnym pracesie», — skazaŭ ministr.
Jon taksama adznačyŭ, što asobasny faktar prysutničaje ŭ luboj prafiesii: «Vy prychodzicie ŭ kramu. Pradaŭcy ŭsie adnolkavyja? Nie ŭsie. Chtości uśmichajecca, a chtości hrubijanić. Prychodzicie ŭ palikliniku. Zdarajecca, što ŭrač nie tak pahladzieŭ. Kazać, što tolki nastaŭniki takija złosnyja, nie razumiejuć dziaciej, niespraviadliva. Treba rabić papraŭku na čałaviečy faktar, mohuć uźniknuć niejkija asobasnyja akaličnaści. Navat akcior na scenie nie kožny raz adnolkava ihraje svaju rolu. Prafiesija piedahoha dosyć składanaja, ja b rekamiendavaŭ pytańni baćkam i nastaŭnikam vyrašać piersanalna, a nie vynosić na šyroki sud hramadskaści, tym samym škodziačy svajmu dziciaci».