Minpryrody: Zdabyvać słancavy haz u najbližejšy čas u Biełarusi nie buduć
Čakać zdabyčy słancavaha hazu ŭ Biełarusi ŭ najbližejšy čas nie prychodzicca, zajaviŭ na pres-kanfierencyi 1 lutaha ŭ Minsku načalnik upraŭleńnia pa hieałohii Ministerstva pryrodnych resursaŭ i achovy navakolnaha asiarodździa Siarhiej Mamčyk.
Zdabyča słancavaha hazu, pavodle słoŭ čynoŭnika, ujaŭlaje saboj vielmi cikavy kirunak dziejnaści, ale zatratny i technična składany. Jon źviarnuŭ uvahu na toje, što ŭ ZŠA daśledavańni pa słancavym hazie pravodzili na praciahu 100 hadoŭ, a technałohii jaho zdabyvańnia źjavilisia tolki ciapier.
Suśvietny kryzis, skazaŭ Mamčyk, staŭ adnoj z pryčyn źnižeńnia cen na naftu, što pryviało da prypynieńnia prajektaŭ pa zdabyčy słancavaha hazu ŭ mnohich krainach. Heta źviazana z tym, što novyja technałohii i ich praktyčnaje prymianieńnie, a taksama daśledavańnie i raspracoŭka novych zaležaŭ słancavaha hazu patrabujuć značnych vydatkaŭ.
«U nas raboty ŭ hetaj halinie nie toje kab prypynienyja, ale nie viaducca farsiravanymi tempami, — paviedamiŭ pradstaŭnik Minpryrody. — Kazać pra toje, što ŭ nas u najbližejšaj budučyni budzie zdabyča słancavaha hazu, pakul ranavata, ale raboty ŭ hetym kirunku iduć. Paralelna z nami daśledavańni pravodzić «Biełaruśnafta» — kab być hatovymi da zdabyčy nie stolki słancavaha hazu, kolki ciažka zdabyvanych zaležaŭ vuhlevadarodnaj syraviny z prymianieńniem novych technałohij, u tym liku šlacham haryzantalnaha bureńnia i hidrarazryvaŭ».
U toj ža čas Mamčyk padkreśliŭ, što dziaržava nie pakidaje temu słancavaha hazu pa-za ŭvahaj, pakolki heta patencyjny enierhietyčny zapas. «U hetym kirunku treba ruchacca», — dadaŭ čynoŭnik.