Dyrektarka «Biełsata»: Ja budu zmahacca za toje, kab kanał zastaŭsia na spadarožniku
Dyrektarka telekanała «Biełsat» Ahnieška Ramašeŭskaja prakamientavała infarmacyju pra spynieńnie finansavańnia kanała polskim MZS. Pra heta piša «Jeŭraradyjo».
«Hetuju infarmacyju ja viedaju 2 tydni. «Biełsat» dziejničaje na padstavie damovy ad 23 krasavika 2003 hoda pamiž Ministerstvam zamiežnych spraŭ Polščy i Polskim telebačańniem, jakaja ŭstalavała praviły hetaha funkcyjanavańnia», — kaža jana.
Pa słovach Ramašeŭskaj, damovu mohuć spynić, ale da kanca 2017-ha ŭsio pavinna zastacca, jak raniej. Heta značyć, što MZS choča z 2018 hoda źmianić, ci skončyć finansavańnie telekanała. A sioleta MZS pavinien vykanać svaje abaviazki finansavańnia zhodna z umovaj.
«Uvieś čas iduć razmovy, jak budzie pracavać telekanał u 2018 hodzie. Ja ŭpeŭnienaja, što «Biełsat» pavinien zastacca na spadarožniku i za heta budu zmahacca. Na praciahu 3-4 tydniaŭ budzie vidać, jakaja budzie situacyja», — skazała Ramašeŭskaja.
U kancy minułaha hoda biełaruski bok abjaviŭ, što rychtuje prapanovu na retranślacyju TVP Polonia u Biełarusi. Marek Ziułkoŭski kaža, što kali takaja prapanova budzie, to ad jaje nielha admaŭlacca:
«Chutka my pabačym, nakolki heta budzie realna dla našaha telebačańnia… My nie pavinny turbavacca z nahody abmiežavanaha efiektu takoj retranślacyi z-za polskaj movy viaščańnia. Viadoma, što hałoŭnymi movami kamunikacyi ŭ Biełarusi źjaŭlajucca biełaruskaja i ruskaja, adnak viedańnie (prynamsi pasiŭnaje) polskaj movy davoli šyrokaje».