Žyćciu biełarusaŭ, jakija paciarpieli avaryju na viertalocie ŭ Konha, ničoha nie pahražaje
Na borcie viertalota, jaki paciarpieŭ avaryju ŭ Demakratyčnaj Respublicy Konha, znachodzilisia troje biełarusaŭ, ich žyćciu ničoha nie pahražaje. Takaja infarmacyja prahučała ŭ efiry telekanała ANT sa spasyłkaj na pradstaŭnika pasolstva Rasii ŭ hetaj afrykanskaj krainie Aleha Iłyšava, paviedamlaje BIEŁTA.
«U rajonie Rutšuru pravincyi Paŭnočnaje Kivu, dzie ŭpali dva viertaloty, byli drennyja ŭmovy nadvorja. Tuman, doždž, byŭ mocny paryvisty viecier. Na borcie adnaho ź viertalotaŭ znachodzilisia troje členaŭ ekipaža, hramadzian Biełarusi. Usie jany vyžyli pry padzieńni, u ciapierašni čas znachodziacca ŭ špitali ŭ horadzie Homa. Ich žyćciu ničoha nie pahražaje», — raspavioŭ Iłyšaŭ.
Krušeńnie viertalotaŭ adbyłosia jašče ŭ minułuju piatnicu, ale padrabiaznaj i kankretnaj infarmacyi było niašmat. Viadoma, što biełarusy znachodziacca ŭ afrykanskaj krainie jak pryvatnyja asoby. Ciapier biełaruskija dypłamaty sprabujuć atrymać źviestki pra incydent z aficyjnych krynic.