Junaki sprabujuć zarehistravać supołku «Moładź Adradžeńnia»
Aktyvisty arhanizacyi «Moładź BNF» padali ŭ Ministerstva justycyi Biełarusi dakumienty na rehistracyju maładziožnaha kulturna-aśvietnickaha abjadnańnia «Moładź Adradžeńnia». Pra heta paviedamlaje pres-słužba «Moładzi BNF».
«My vyrašyli stvaryć svaju, tak by mović, kulturnuju placoŭku, bo my robim davoli šmat kulturnych i adukacyjnych rečaŭ i žadali b vyvieści ich na bolš jakasny ŭzrovień. «Moładź BNF» — heta ŭžo palityčny brend, i častka arhanizacyj dy ŭstanovaŭ baicca supracoŭničać z nami ŭ lubych kirunkach, tamu pasprabujem pajści takim šlacham», — prakamientavaŭ inicyjatyvu stvareńnia novaha maładziožnaha abjadnańnia kiraŭnik «Moładzi BNF» Juryj Łukaševič.
Jak ličać u arhanizacyi, heta stanie svojeasablivaj «łakmusavaj papierkaj» dla ŭładaŭ, jakija ŭ apošni čas zajaŭlajuć ab padtrymcy biełaruskaj kultury, historyi i movy. «U toj ža momant jany rehistrujuć adkryta prarasijskija arhanizacyi, takija jak «Rumoł». Dyk ci pojdzie ŭłada na toje, kab zarehistravać patryjatyčnuju prabiełaruskuju arhanizacyju?»
— zadajecca pytańniem pres-słužba «Moładzi BNF».
Aktyvisty ličać, što aficyjny status im dapamoža papularyzavać biełaruskuju kulturu, historyju, movu,
prasoŭvać idei i mety «Moładzi BNF». Pry hetym jany zajaŭlajuć, što
novaja arhanizacyja nie stavić palityčnych metaŭ
i nie źbirajecca dziejničać u hetym kirunku.