Airbus pakaža kancept latalnaha aŭtamabila na Ženieŭskim aŭtasałonie
Jeŭrapiejskaja avijabudaŭničaja kampanija Airbus pradstavić na Ženieŭskim aŭtasałonie latalny aŭtamabil, paviedamlaje Associated Press.
Madel Pop.Up — modulny transpartny srodak, jaki pracuje na elektryčnaści biez škodnych vykidaŭ u atmaśfieru. Latalny aŭtamabil zmoža vyrašyć prablemy zatoraŭ u vialikich haradach.
Modulnaja kanstrukcyja praduhledžvaje mahčymaści pierasoŭvańnia jak pa ziamli, tak i pa pavietry. Pasažyrskaja kapsuła moža jechać pa darozie, a potym dałučycca da 4-prapielernaha pavietranaha transpartnaha modula, što dazvolić pasažyram, jakija śpiašajucca, pakinuć miesca zatoru na darozie pavietranym šlacham.
Pradstaŭnik Airbus Macijas Tomsen adznačyŭ, što avijabudaŭničy hihant płanuje ŭkaranić hetyja transpartnyja srodki ŭžo praz 5—10 hadoŭ. Hałoŭnaja pieraškoda — nieabchodnaść stvareńnia śpiecyjalnaj haradskoj infrastruktury, a taksama praviłaŭ, jakija b rehulavali ekspłuatacyju takich latalnych aŭtamabilaŭ u haradskich umovach. Heta supolnaja praca dla ŭrbanistaŭ, płaniroŭščykaŭ i jurystaŭ, tamu ŭ najbližejšyja 5 hadoŭ nie varta čakać źjaŭleńnia takich mašyn na vulicach.
Pop.Up vykarystoŭvaje sistemu štučnaha intelektu, jakaja dazvalaje vybrać pasažyru punkt pryznačeńnia, prapanoŭvaje alternatyŭnyja scenaryi i pracuje z sacyjalnymi sietkami karystalnika. Pasažyr moža płanavać svajo padarožža pry dapamozie mabilnaha dadatka.
U Airbus adznačyli, što stvareńnie padobnych transpartnych srodkaŭ niemahčyma biez kaapieracyi roznych halin pramysłovaści i technałohij.
Ženieŭski aŭtasałon prachodzić z 9 pa 19 sakavika. Na im budzie pradstaŭlena kala 900 madelaŭ ad 180 udzielnikaŭ vystavy.