Arhanizatara pratestu ŭ Słonimie schapili praz hadzinu paśla abiacańnia staršyni rajvykankama nikoha nie karać
Žychar Słonima Viktar Marčyk.
U Słonimie byŭ zatrymany žychar horada Viktar Marčyk. Heta jon uziaŭ na siabie inicyjatyvu za praviadzieńnie mitynhu pratestu ŭ horadzie nad Ščaraj.
«My išli paśla akcyi pa vulicy 17 vieraśnia, nas było piać čałaviek. Raptam padjechaŭ bus — čorny «Ford» biez numaroŭ,
vyskačyli chłopcy ŭ čornym, załamali Viktara, ukinuli ŭ bus, — raskazaŭ karespandentu «Našaj Nivy» žychar Słonima Pavał Sievaścian. — Tolki paznali adnaho z tych, u cyvilnym: jaho proźvišča Ščurski, jon supracoŭnik RAUS.
My pryjšli ŭ milicyju, i nam paviedamili, što Viktar Marčyk ciapier u izalatary časovaha ŭtrymańnia, zaŭtra budzie sud. Jamu inkryminujuć artykuł 23.34 AK — arhanizacyja niesankcyjanavanaha masavaha mierapryjemstva».
Na siońniašni marš u Słonimie sabralisia sotni ludziej, da ludziej vychodziŭ staršynia rajvykankama Aleh Tarhonski.
Arhanizataram maršu vystupiła Słonimskaja kaalicyja demakratyčnych arhanizacyj.
Ludziej płoščy ich sustreŭ staršynia rajvykankama Aleh Tarhonski i rajonnyja čynoŭniki.
Padčas rezkaj hutarki ŭdzielniki jamu pryhadali, jak na pradpryjemstvach zapałochvali tych, chto źbiraŭsia ŭdzielničać u maršy, pahražali vyhnać z pracy. Staršynia Słonimskaha rajvykankama paprasiŭ usich, chto budzie mieć na pracy prablemy paśla akcyi, źviartacca asabista da jaho.
«Čuli? Ničoha nie bojciesia», — hučna abviaściŭ u miehafon aktyvist Viktar Marčyk.
Pavodle słovaŭ staršyni rajvykankama, u rajonie było razasłana kala 1,5 tysiačy «listoŭ ščaścia» pra vypłatu padatku za darmajedstva.
Ludzi patrabavali pracy, Tarhonski kazaŭ, što hatovy da kampramisu, ale «nie treba zarobak nazyvać pałučkaj» i «kala adnaho vienika pa piać čałaviek stajać nie budzie, a hrošy treba zarabić». U pryvatnaści, jon skazaŭ pra pieramovy z Astravieckim rajonam nakont pracy słonimcaŭ na budaŭnictvie Astravieckaj AES.
«Dy ŭsie biahuć z toj AES! Kolki tam zarobiš!» — reahavali ludzi.
Paśla słova ŭziaŭ adzin z udzielnikaŭ mitynhu, były rabotnik adnaho z aŭtaparkaŭ. «Staršynia nam raboty nie daść, u jaho jaje niama, — skazaŭ jon i adznačyŭ, što treba prosta admianić Dekret №3. — I chaj naša ŭłada budzie inicyjataram hetaha».
«Admianić! Admianić!» — skandavali ludzi.
Paśla pryniaćcia supolnaj rezalucyi ŭdzielniki pamału pačali razychodzicca. Pa indyvidualnych pytańniach, jakich padčas mitynhu hučała bolšaść, Tarhonski zaprašaŭ usich u paniadziełak na pryjom u rajvykankam.
Maršu ŭ Słonimie papiaredničała masavaje zastrašvańnie ludziej. Milicyja jeździła na pradpryjemstvy i zaścierahała ludziej ad udziełu. Dziaržaŭnyja ŚMI taksama źniali šerah prahram, u jakich vystaŭlali ŭdzielnikaŭ pratestaŭ vorahami narodu.
Alaksandr Łukašenka na publiku zajaviŭ ab tym, što ludziam treba dać mahčymaść vykazacca, ale pravakataraŭ vykałuplivać jak razynki z bułačak. Paśla hetaha za 15 dzion u krainie zatrymali jak minimum 210 čałaviek — praktyčna ŭsich, chto na mitynhach biare na siabie inicyjatyvu.