Pryvatnaja kampanija ź Biełarusi razam z łatyšami kupić ukrainskuju «dačku» Śbierbanka
Kansorcyum inviestaraŭ — łatvijski bank i nienazvanaja pryvatnaja biełaruskaja kampanija nabyvaje 100% akcyj PAT «Śbierbank» (Ukraina), jakoje źjaŭlajecca daččynym bankam PAT Śbierbank. Pra heta piša Tut.by sa spasyłkaj na pres-słužbu banka.
«U Kansorcyum ŭvojduć Norvik Bank (Łatvija) i biełaruskaja pryvatnaja kampanija. Adpaviedny jurydyčny dahavor padpisany 27 sakavika», - havorycca ŭ paviedamleńni.
Zakryćcio ździełki čakajecca ŭ pieršym paŭhodździ 2017 hoda paśla atrymańnia adabreńniaŭ ździełki finansavymi i antymanapolnymi rehulatarami adpaviednych jurysdykcyj, uklučajučy Łatviju i Ukrainu.
Nahadajem, prezident Ukrainy Piatro Parašenka 16 sakavika ŭvioŭ u dziejańnie sankcyi ŭ dačynieńni da piaci bankaŭ z rasijskim kapitałam terminam na hod. Pad sankcyi trapili Śbierbank, Prominviestbank, VTB, BM Bank i VS Bank. Heta adbyłosia paśla nieadnarazovych napadaŭ na banki z rasijskim kapitałam va Ukrainie. Tolki za adzin tydzień va Ukrainie było ździejśniena 26 napadaŭ na ŭkrainskija adździaleńni Śbierbanka.
U paviedamleńni Norvik Banka skazana, što «mažarytarnym akcyjanieram novaha kansorcyuma staŭ hramadzianin Vialikabrytanii Said Huceryjeŭ i naležačaja jamu biełaruskaja kampanija», udakładniaje meduza.io.
Said Huceryjeŭ - syn Michaiła Huceryjeva, uładalnika «Ruśśniefť» i «Binbanka».
Cikava, što raniej paviedamlałasia, što Huceryjevy i Viktar Prakapienia ŭkłali hrošy ŭ startap Banuba, što raspracoŭvaje mabilnyja dadatki na asnovie technałohij dapoŭnienaj realnaści.