Biełarusy Ńju-Jorka na Dzień Voli zładzili viečarynu ŭ bary Drom
Dla amierykanskich biełarusaŭ śviatkavańnie Dnia Voli u hetym hodzie było azmročana navinami pra brutalnyja zatrymańni paśla mitynhaŭ niedarmajedaŭ 15-ha sakavika i niepasredna pierad 25-m sakavika.
Z hetaj nahody Biełaruska-amierykanskaje zhurtavańnie «Pahonia» u piatnicu 24-ha sakavika praviało akcyju salidarnaści ŭ Niu-Jorku - mitynh nasuprać budynku Biełaruskaha kansulatu. Pad bieł-čyrvona-biełymi ściahami sabrałasia niekalki dziasiatkaŭ maładych ludziej ź Niu-Jorku i navakołlla, a niekalki ŭdzielnikaŭ navat prylacieli z Fłarydy.
25-ha sakavika śviatkavańnie 99-ch uhodkaŭ abvieščańnia niezaležnaści Biełaruskaj Narodnaj Respubliki adznačałasia va ŭsich biełaruskich asiarodkach u ZŠA i ŭ Kanadzie. Na śviatkavańni, ładžanym BAZ Pahonia, Siaržuk Sokałaŭ-Vojuš pradstaviŭ svaju novuju pieśniu 'Hodzie! Do!', jakuju ŭdzielniki śviatkavańnia praśpiavali razam ź im. U niadzielu, 26-ha sakavika ŭ Biełaruskich cerkvach adbyŭsia malebien za Niezaležnaść Biełarusi i za biełaruski narod. Paźniej adbyŭsia jašče adzin šmatludny mitynh u Ńju-Jorku na Junijan-ckver.
Viečaram 26-ha sakavika biełarusy i prychilniki biełaruskaj niezaležnaści sabralisia u bary DROM na viečarynu, arhanizavanuju prajektam Hanny Šarko 'Dzied Baradzied' pry padtrymcy BAZ Pahonia. Heta toj samy bar i toj samy prajekt, dziakujučy jakomu čatyry miesiacy tamu adbyŭsia kancert Lavona Volskaha ŭ Niu-Jorku.
Alaksiej Saprykin, hość ź Minsku, pa-majstersku trymaŭ uvahu prysutnych prezientacyjaj prajektaŭ kulturnickaj placoŭki Art Siadziba i viasiołaj kamandnaj hulnioj pa biełaruskaj tematycy.
Z pryvitańniami vystupili ctaršynia BAZ Pahonia Vital Zajka i hramadski dziejač Franak Viačorka. Muzyčnaja prahrama pačałasia z debiuta dueta Piatra Barceviča i Alaksandra Chackieviča. U vykanańni dueta prahučali niekalki papularnych tvoraŭ z prajektaŭ Lavona Volskaha.
Nastupnym na scenie byŭ niepaŭtorny Piotr Klujeŭ. Jaho dynamika i emacyjny śpieŭ padbadzioryli prysutnych i natchnili na ramantyku i tancy. Viečaryna adbyvałasia ŭ siabroŭskaj atmaśfiery. Valery Klimovič uźniaŭsia na scenu i padzialiŭsia svaimi razvažańniami pra žyćcio i svabodu. Jon vykanaŭ paru pieśniaŭ pad hitaru.
U jakaści siurpryza Piotr Klujeŭ vykanaŭ vakałam biez akampaniemientu pieśniu na słovy Hienadzia Buraŭkina 'Začarovannaja'. Zdavałasia, što kožny śpiavaŭ razam ź im. Na zakančeńnie ŭsie prysutnyja stojačy praśpiavali biełaruski marš 'My vyjdziem ščylnymi radami'. Ale i na hetym śviatkavańnie nie skončyłasia - dadalisia inšyja patryjatyčnyja pieśni ŭ supolnym vykanańni. Na raźvitańnie hučała ŭračystaje Žyvie Biełaruś!
Alaksiej Saprykin i staršynia BAZ «Pahonia» Vital Zajka
Vystupaje Piatro Klujeŭ
Pieršaje miesca zaniała kamanda «Nie treba»
Kamanda «Zubry»