Łukašenka adpraŭlajecca ŭračysta zapuskać kalijny prajekt u Turkmienistanie
Prezident Biełarusi Alaksandr Łukašenka adpraŭlajecca z aficyjnym vizitam u Turkmienistan z 29 pa 31 sakavika, paviedamlaje pres-słužba kiraŭnika dziaržavy.
Fota: president.gov.by
30 sakavika Łukašenka spačatku praviadzie pieramovy z prezidentam Turkmienistana Hurbanhuły Bierdymuchamiedavym u farmacie «sam-nasam», a zatym u pašyranym składzie. Baki płanujuć abmierkavać šyroki śpiektr pytańniaŭ, jakija vyklikajuć uzajemnuju cikavaść. Asablivaja ŭvaha budzie nadadziena raźvićciu handlova-ekanamičnaha supracoŭnictva. Pa vynikach pieramoŭ čakajecca padpisańnie šerahu dvuchbakovych dakumientaŭ.
Płanujecca, što lidary dźviuch krain taksama voźmuć udzieł u cyrymonii adkryćcia kompleksu budynkaŭ ambasady Biełarusi ŭ Turkmienistanie.
Na nastupny dzień Łukašenka i Bierdymuchamiedaŭ naviedajuć Harłykski horna-abahačalny kambinat, budaŭnictva jakoha było niadaŭna zavieršana biełaruskim bokam. Kiraŭniki dziaržaŭ va ŭračystaj abstanoŭcy daduć start pracy zavoda, a zatym aznajomiacca z vytvorčaściu.
Jak raniej paviedamlałasia, turkmienski i biełaruski baki nie raz pradjaŭlali ŭzajemnyja pretenzii z nahody chodu realizacyi hetaha prajekta.
Minsk vykazvaŭ zaniepakojenaść z nahody nievykanańnia turkmienskim bokam uziatych na siabie finansavych i inšych abaviazacielstvaŭ pa budaŭnictvie Harłykskaha HAKa. Pavodle infarmacyi biełaruskaha boku, biełaruskija budaŭniki sutykalisia z šmatlikimi pieraškodami, što niehatyŭna ŭpłyvała na chod budaŭnictva.
Ašchabad, sa svajho boku, byŭ niezadavoleny nienaležnym vykanańniem biełaruskimi padradčykami kantraktnych abaviazacielstvaŭ pa budaŭnictvie HKA, značnaje adstavańnie ad zapłanavanych terminaŭ budaŭnictva asobnych abjektaŭ infrastruktury kambinata i zatrymki vypłaty zarobkaŭ turkmienskim hramadzianam.
Pahadnieńnie ab budaŭnictvie ŭ Turkmienistanie pad kluč horna-abahačalnaha kompleksu pa vytvorčaści kalijnych uhnajeńniaŭ było adobrana pa vynikach vizitu Alaksandra Łukašenki ŭ Ašchabad u 2009 hodzie. U pačatku 2010 hoda pamiž dziaržkancernami «Turkmienchimija» i AAT «Biełharchimpram» byŭ padpisany kantrakt na budaŭnictva pad kluč HAKa mahutnaściu 1,4 młn tonaŭ chłarydu kaliju ŭ hod, u tym liku 0,6 młn ton hranulavanaha i 0,8 młn tonaŭ drobnaziarnistaha. Košt kambinata — 1 młrd dalaraŭ. Zhodna ź pieršapačatkovymi damoŭlenaściami, kambinat pavinien byŭ być zdadzieny ŭ 2015 hodzie. U ciapierašni čas uvod pradpryjemstva pryznačany na 2017 hod.