Prymusova vysialajuć siamju žančyny, jakaja pratestavała na kranie
Vysielić siamju Ihnatovičaŭ ź ich doma mahli jašče 1 lutaha, adnak u pryznačany dzień Halina Kanstancinaŭna pajšła na adčajny krok. U znak pratestu suprać niespraviadlivaj kampiensacyi za znos jana zabrałasia na viežavy kran i pahražała ź jaho skinucca. Tady ŭłady horada i haradskaja prakuratura paabiacali razabracca ŭ hetaj spravie. Ale razborki ni da čaho nie pryviali. Siońnia siamju Ihnatoviča raśsielać u try dvuchpakajovyja kvatery ŭ damach pa vuł. Vyhockaha, 133, vuł. Rusijanava, 46, pr. Hazieta «Źviazda», 69.
10 z 11 čałaviek, jakija pražyvajuć u domie, užo źniatyja z rehistracyjnaha ŭliku ŭ domie na vulicy Ržavieckaj.
— Učora ŭviečary znoŭ prynieśli apaviaščeńnie ad adździeła prymusovaha vykanańnia pra toje, što siońnia pryjduć vysialać, — raspaviadaje TUT.BY Halina Kanstancinaŭna.
U apaviaščeńni pieraličanyja tyja členy siamji, jakich jano tyčycca: 10 čałaviek. Novaja žonka Ivana Ihnatoviča, Taćciana Marynčyk, nie zhadanaja. Jaje sud pieršaj instancyi pastanaviŭ vysielić u «dvušku» da muža i jaho byłoj žonki, Haliny Ihnatovič, ale hetaje rašeńnie jašče abskardžvajecca.
Napiaredadni svaje rečy Ihnatovičy z domu vyvieźli sami. Žyvuć u svajakoŭ i znajomych — klučy ad kvater, jakija zabudoŭščyk pieradaŭ u jakaści kampiensacyi, atrymlivać admaŭlajucca.
Halina Ihnatovič choča, kab dolu siemjaŭ jaje synoŭ addali kvaterami, a joj z mužam vypłacili hrašovuju kampiensacyju, kab jany mahli narešcie raźjechacca, kupiŭšy asobnaje žyllo, chaj i nie ŭ Minsku. Zabudoŭščyk, hrupa kampanij «Tapas», upeŭnieny: zakonnaść była vykananaja ŭ poŭnym abjomie. A Ihnatovičy «chočuć uzbahacicca».
Rašeńnie suda ab vysialeńni było prypyniena da zakančeńnia prakurorskaj pravierki. Pra «žančynu na kranie» ŭzhadvaŭ i Łukašenka, jaki daručyŭ razabracca ŭ situacyi «pa zakonie» i «pa spraviadlivaści». Doŭžyłasia pravierka adzin miesiac. U vyniku «sprava razhledžana z ulikam pradstaŭlenych dokazaŭ, istotnych parušeńniaŭ normaŭ materyjalnaha i pracesualnaha prava nie dapuščana», havorycca ŭ novym liście za podpisam prakurora horada Minska. U hienieralnaj prakuratury ŭ skarzie taksama admovili.