KDB zavioŭ kryminalnuju spravu suprać biełarusa, jaki vajavaŭ za «DNR»
«Sovietskaja Biełoruśsija» apublikavała intervju z kiraŭnikom HUBAZiK MUS Mikałajem Karpiankovym.
Źviartaje ŭvahu fraza Karpiankova pra vyniki raboty 3-ha ŭpraŭleńnia HUBAZiK (pa supraćdziejańni ekstremizmu).
«Uličvajučy napružanuju abstanoŭku ŭ śviecie, u našych paŭdniovych susiedziaŭ, sproby praviadzieńnia pratestnych akcyj u haradach Biełarusi, našyja namahańni skiravanyja na biełaruskich hramadzian — bajevikoŭ, najmitaŭ, jakija znachodziacca va Ukrainie, — cytuje Karpiankova «SB». — Sumiesna z Kamitetam dziaržaŭnaj biaśpieki prymajem šerah apieratyŭna-prafiłaktyčnych zachadaŭ. Zaviedziena niekalki kryminalnych spraŭ. Pakul samaja značnaja i rezanansnaja — u dačynieńni viciebčuka Hančarova, jakija vajavaŭ u «Azovie».
Taksama pa našych materyjałach KDB zavioŭ kryminalnuju spravu ŭ dačynieńni da hramadzianina Biełarusi, jaki braŭ udzieł u bajavych dziejańniach na baku «ŁNR-DNR». Takim čynam, stvoranyja zahradžalna-prafiłaktyčnyja ŭmovy: kali bajeviki tut źjaviacca — zatrymajem, pryciahniem da kryminalnaj adkaznaści».
Ilustracyjnaje fota.
U pres-słužbie KDB «Našaj Nivie» nie raskazali akaličnaści spravy suprać bajevika, zhadanaha Karpiankovym. Hetak ža i ŭ samim HUBAZiK nam patłumačyli, što pakul što hetaja infarmacyja nie padlahaje razhałošvańniu.
Raniej my nieadnarazova paviedamlali, što asoby, jakija brali ŭdzieł u vajnie na baku «ŁNDR», svabodna pačuvajucca ŭ Biełarusi.
Raniej ničoha nie było viadoma pra kryminalnyja spravy, zaviedzienyja suprać ich mienavita za najmictva — pa infarmacyi «Našaj Nivy», niekalki bajavikoŭ «ŁDNR» adbyvajuć u Biełarusi pakarańni pa inšych artykułach, u pryvatnaści — za niaspłatu padatkaŭ.