Akcyja da Dnia Salidarnaści prajšła ŭ Viciebsku na Ŭśpienskaj horcy
Na bierazie Dźviny, kala kryža, ustalavanaha na miescy zabojstva arcybiskupa Jazafata Kunceviča, pakutnika za vieru, kananizavanaha katalickaj dy vunijackaj carkvami, a 7-j viečara sabralisia maładyja ludzi. Ale śviečki byli zapalenyja imi ŭ honar inšaje padziei - z nahody Dnia salidarnaści ź biełaruskimi palitviaźniami dy siemjami źnikłych biełaruskich hramadzianaŭ.
Abviestka pra akcyju tolki siońnia źjaviłasia na adnym ź viciebskich internet-forumaŭ. Nieviadomy inicyjatar napisaŭ: «Užo nie pieršy raz my vyjdziem na vulicu j budziem salidarnymi z usimi, chto byŭ u turmie paśla vybarau, j tymi, što jašče nia vyjšli na volu. Nas šmat! My -- budučynia! Nie stabilnaść utopii nam patrebnaja, a prahres i raźvićcio!»
Milicyjanty na hetuju abviestku nijakim čynam nie zreahavali - prynamsi, pablizu ad miesca praviadzieńnia akcyi nie było zaŭvažana nivodnaha supracoŭnika i nivodnaj słužbovaj mašyny.
Na zaklik adhuknulisia 25 chłopcaŭ i dziaŭčat: jany pryjšli na Ŭśpienskuju horku sa śviečkami, jakija raźmiaścili na pastamencie pamiatnaha kryža. Zaviazaŭšy na kryžy błakitnuju stužku z nadpisam «Biełaruś - u Eŭropu!», udzielniki akcyi plačo da plača moŭčki paŭstali vakoł.
Akcyja salidarnaści praciahvałasia pryblizna 40 chvilin.