Ad pačatku hoda kvatery va ŭsich abłasnych centrach praciahvajuć tańnieć REJTYNH
Ad pačatku hoda va ŭsich abłasnych centrach, a taksama ŭ Mazyry, Połacku i Lidzie, kvatery praciahnuli tańnieć, paviedamlaje Realt.by. U Hrodnie i Homieli za studzień-sakavik košty apuścilisia bolš čym na 5%.
Inšaja hrupa, jakaja składajecca vyklučna z bujnych haradoŭ biez statusu abłasnoha centra, adznačyłasia stanoŭčaj dynamikaj. Pryčym miescami tempy rostu koštaŭ byli dosyć vysokimi - čaho vartyja +3-4% u Salihorsku, Pinsku i Oršy. Minsk z pakazčykam -0,4% za pieršy kvartał 2017 hady znachodziŭsia roŭna ŭ siaredzinie śpisu.
Nie sakret, što zvyčajna novyja trendy zaradžajucca ŭ stalicy, zatym padziei paŭtarajucca ŭ abłasnych centrach i tolki potym u astatnich bujnych haradach krainy. Situacyja, kali va ŭsich abłasnych centrach kvatery tańniejuć, a ŭ bolšaści inšych bujnych haradoŭ rastuć u canie, źjaŭlajecca davoli niečakanaj.
Kali razhladać apošnija 12 miesiacaŭ, to Minsk pakul adziny horad, dzie siaredniaja cana pradadzienych kvater nie źniziłasia (+1%). Siarod abłasnych haradoŭ samaje niaznačnaje źnižeńnie było zafiksavana ŭ Viciebsku (-6%), a ŭ Homieli košty apuścilisia na važkija 15%. Siarod inšych bujnych haradoŭ najmienšaje źnižeńnie koštaŭ adznačana ŭ prystaličnych Barysavie i Maładziečnie (-7%), a maksimalnaja karekcyja zafiksavana ŭ Babrujsku (-14%) i Lidzie (-18%).