Sud vučanicy suprać nastaŭnicy: škoła pavinna vypłacić 8000 rubloŭ kampiensacyi
Sud Zavodskaha rajona Minska pastaviŭ kropku ŭ spravie vučanicy suprać nastaŭnicy. Piedahoh Ała Bažko, pavodle rašeńnia suda, pavinna vypłacić štraf 100 bazavych (2300 rubloŭ). Škoła — pakryć siamji dziaŭčynki 121 rubiel materyjalnaha ŭronu i 8000 rubloŭ maralnaj škody.
Fota pradastaŭlena Natallaj Panciejevaj
Padčas sudovych sprečak prakuror prasiła pryznačyć nastaŭnicy dva hady abmiežavańnia voli.
Nastaŭnicu Ału Bažko abvinavačvali pa č. 1 art. 165 KK RB (Nienaležnaje vykanańnie abaviazkaŭ pa harantavańni biaśpieki žyćcia i zdaroŭja dziaciej). Maksimalnaje pakarańnie pa hetym artykule — abmiežavańnie voli terminam na try hady.
Nahadajem, u kastryčniku 2015 hoda ŭ škole №109 Minska adbyłosia nadzvyčajnaje zdareńnie. Pieršakłaśnica Jula Panciejeva sutyknułasia z nastaŭnicaj Ałaj Bažko, jakaja trymała ŭ rukach čajnik z haračaj vadoj. Vada trapiła na padbarodak, šyju i plačo dziaŭčynki. Dziaŭčynka atrymała apioki 1-2-3A stupieni. U momant zdareńnia ŭ kłasie znachodziłasia jašče dva piedahohi: Ludmiła Šupa — na toj momant kłasny kiraŭnik Juli Panciejevaj i defiektołah Ina Muśko.
Mama dziciaci Natalla damahłasia, kab była zaviedziena kryminalnaja sprava. Žančynu aburyła, što piedahohi patelefanavali joj praz 40 chvilin paśla taho, što zdaryłasia: «Da hetaha jany navat chutkuju nie vyklikali». Rodnyja dziaŭčynki pradjavili da škoły i ŭpraŭleńnia adukacyi sportu i turyzmu administracyi Zavodskaha rajona Minska isk ab maralnaj kampiensacyi - 20 000 rubloŭ, akramia taho, prosiać pakryć materyjalny ŭron - 121 rubiel.
Jula z mamaj Natallaj, fota Vadzima Zamiroŭskaha
— Toje, što Bažko nie źjaŭlałasia kłasnym kiraŭnikom Panciejevaj i ŭ momant zdareńnia nie viała ŭ dziaŭčynki ŭroki, nie zdymaje ź jaje adkaznaści i abaviazki pa biaśpiecy i achovie žyćcia i zdaroŭja navučencaŭ, — zajaviła padčas sudovych sprečak dziaržabvinavaŭca. — Bažko pavinna była pierakanacca, ci znachodziacca ŭ pamiaškańni ź joj vučni, i zabiaśpiečyć achovu ich žyćcia i zdaroŭja. Heta značyć stvaryć biaśpiečnyja ŭmovy adukacyjnaha pracesu. U vypadku nienaležnaha vykanańnia hetych abaviazkaŭ — panieści adkaznaść za nastupstvy.
Aleh Rudenka, abaronca Ały Bažko, byŭ nie zhodny z patrabavańniami prakurora i nazvaŭ ich zanadta surovymi. «Nie ŭličanyja nijakija źmiakčalnyja abstaviny, - kazaŭ jon. - U spravie zastałosia šmat pytańniaŭ, jakija nia raskryła ni śledstva, ni sudovy praces».
— Praktyčna śledstva pryznačyła vinavataha ŭ tym, što zdaryłasia, - adznačyŭ Aleh Rudenka.
Pa słovach advakata, toje, što zdaryłasia ź Julaj Panciejevaj stała trahiedyjaj nie tolki dla dziaŭčynki i jaje baćkoŭ, ale i dla piedahoha.
Ała Bažko, fota Vadzima Zamiroŭskaha
Aleh Rudenka prasiŭ pierakvalifikavać abvinavačvańnie jaho padabaronnaj pa artykule 155 KK RB ( «Pryčynieńnie ciažkaha abo mienš ciažkaha cialesnaha paškodžańnia pa nieaściarožnaści») i pryznačyć minimalna mahčymaje pakarańnie ŭ ramkach sankcyi ŭkazanaha artykuła.
— Bažko ščyra raskajvajecca ŭ zroblenym i hatovaja nieści zakonnuju adkaznaść, — praciahnuŭ Aleh Rudenka. — Jana całkam pryznaje patrabavańni ŭ pakryćci materyjalnaj škody i častkova — maralnaj škody.
Sud prysudziŭ nastaŭnicu Ału Bažko da štrafu 100 bazavych vieličyniaŭ (2300 rubloŭ). Jana taksama pavinna pakryć siamji dziaŭčynki pracesualnyja vydatki — 1660 rubloŭ. Škoła, pa rašeńni suda, pavinna vypłacić siamji vučanicy 8000 rubloŭ (maralnuju škodu) i 121 rubiel (materyjalny ŭron).
U pazovie da ŭpraŭleńnia adukacyi, sportu i turyzmu Zavodskaha rajona Minska admoŭlena.