U Maładziečnie dvoje padletkaŭ sprabavali vykinuć sakurśnika z akna kaledža. Im pahražaje da 6 hadoŭ pazbaŭleńnia voli
Zdareńnie adbyłosia ŭ adnym z kaledžaŭ Maładziečna, paviedamiŭ aficyjny pradstaŭnik UUS Minabłvykankama Alaksandr Marčanka.
U pierapynku pamiž zaniatkami dvoje 17-hadovych chłopcaŭ žorstka ździekavalisia z 16-hadovaha adnakurśnika.
Pačałosia ŭsio z abrazaŭ. Potym kryŭdzicieli schapili junaka i paciahnuli jaho da akna. Trymajučy achviaru hałavoj uniz z vonkavaha boku padvakońnia, złamyśniki pahražali skinuć jaho z druhoha paviercha. Kryki ab dapamozie pryciahnuli ŭvahu inšych sakurśnikaŭ, jakija spynili ździek.
Pra incydent paviedamili ŭ milicyju. Raspačata kryminalnaja sprava pa č.2 art.339 KK (chulihanstva, ździejśnienaje hrupaj asob).
Sankcyja artykuła praduhledžvaje pakarańnie ŭ vyhladzie pazbaŭleńnia voli terminam da 6 hadoŭ.
«Abodva padazravanyja stajać na ŭliku i nieadnarazova pryciahvalisia da administracyjnaj adkaznaści. Najbolš raspaŭsiudžanyja pravaparušeńni ŭ ich bijahrafii — drobnaje chulihanstva i raśpivańnie śpirtnoha ŭ hramadskim miescy, — raspavioŭ staršy ŭčastkovy inśpiektar ISN Maładziečanskaha RAUS Alaksandr Puškarevič. — Na hety raz svaje dziejańni padletki patłumačyli žadańniem pažartavać «.
Akramia taho, adzin ź fihurantaŭ spravy abvinavačvajecca ŭ kradziažy rovara, jaki jon ździejśniŭ kala miesiaca tamu. Na čas śledstva jamu abrali mieru strymańnia ŭ vyhladzie chatniaha aryštu. Adnak ciapier mohuć zaklučyć pad vartu.