Listy patryjotaŭ. Piša Mikoła Michalkoŭ: «Kryŭdna, što rodnaja dziaržava tak «adździačyła»…»
«Naša Niva» praciahvaje publikavać listy aryštavanych pa «spravie patryjotaŭ» i prapanuje ŭvazie čytačoŭ list ad Mikałaja Michalkova, kiraŭnika babrujskaha vajskova-patryjatyčnaha kłuba «Patryjot». List pieradała ŭ Redakcyju siabroŭka Mikałaja i maci adnaho z vychavancaŭ kłuba.
«Vitaju ciabie, maja siabroŭka Taćciana! Mušu adrazu prasić vybačeńnia za pamyłki, bo ja ž u škole movu nie vyvučaŭ (tamu trochu soramna za hramatyku, ale jak jość). Spačatku dziakuj za padtrymku i vieru, nasamreč heta vielmi patrebna. Ja navat i ŭjavić sabie nie moh, što apynusia z synam u takich brydotnych abstavinach. Pra abvinavačańnie navat i kazać nie žadaju, ni ŭ mianie, ni ŭ maich chłopcaŭ navat i dumak takich nie było. Ale bač, jak jany ŭsio vykrucili…
Pieršyja dva tydni prosta dach źjazdžaŭ ad chvalavańnia, kryŭdy i abureńnia. Zaraz trochu suniaŭsia i razumieju, što treba prosta čakać i bierahčy zdaroŭje. Jany ŭsio ŭžo daŭno vyrašyli za nas. Tamu tolki čakać. Maju nadzieju, što praź ŚMI vy i tak užo ŭsio vielmi dobra viedajecie i razumiejecie. Dzie chłuśnia, a dzie praŭda i sama bačyš. Vo trapiŭ u historyju dyk užo trapiŭ, ale bolš za ŭsio kryŭdna za syna. Vielmi balić, kožnuju noč śniu jaho. Ja im hetaha daravać nie zmahu. Kali my ź Janam złačyncy, to dzień staŭ nočču…»
Vialiki dziakuj za dobryja słovy ad siabroŭ, svajakoŭ i znajomych, pryjemna viedać, što ludzi razumiejuć, što nasamreč adbyvajecca. Bo na ŭsiu krainu ŭ brud vypeckali… Ja chutčej za ŭsio ŭžo nikoli nastaŭnikam nie budu. Chto mianie paśla ŭsiaho hetaha voźmie ŭ adukacyju?…»
«Taniucha, zahadvaju nie chvareć na serca, chopić hetych chvarob. A to budziem chutka pracavać na leki. A kali ščyra, ja vielmi chvalujusia za ŭsich, ja ž razumieju, što ad hetaj historyi pakutujem nie tolki my ź Janam, a i ŭsie, chto nas kachaje i čakaje. Ja navat i nie čakaŭ stolki ciopłych słoŭ i takoj padtrymki. Tamu ja kažu, što treba supakoicca i zapaścisia ciarpieńniem.
Apynuŭšysia za kratami, vielmi dobra pačynaješ razumieć košt kachańnia, siabroŭstva, voli i ŭvohule ŭsiaho astatniaha, na što ŭ zvyčajnym žyćci nie źviartaješ uvahi. Tutaka ciabie pazbaŭlajuć amal usiaho, i tolki viera i kachańnie nadajuć sapraŭdnuju moc…»
«Budzie jak budzie, usio vyrašana biez nas i za nas. Hałoŭnaje, ja viedaju, što mnie vierać, mianie kachajuć i mianie čakajuć. Značycca, nie darma pałovu žyćcia pražyŭ. Kryŭdna tolki, što rodnaja dziaržava tak adździačyła. A i chalera ź joj. A jašče vielmi škada skradzienaha času i vašych dziavočych śloz. Svaich nie škada. Kali čytaju listy z voli ź ciopłymi słovami padtrymki i kachańnia, jany, miarzotniki, sami ciakuć z vačej. Staleju, stanaŭlusia bolš čułym ))) Tvaja dumka nakont taho, što ja nibyta na adpačynku, trochu raźviesialiła. Na vieršy pakul nie ciahnie, prosta čytaju knihi, prynosiać i na movie. Kali byŭ u adzinocie, dyk tolki biełaruskija i prynosili.
Listuj, budu ŭdziačny. Jak muž? U jakoj zaraz «hałaktycy»? Maja «hałaktyka» zaraz — heta vašy listy, dumki, pačućci i knihi.
Da sustrečy! Nie chvareć!»
***
Nahadajem, što kiraŭnik kłuba «Patryjot» Mikałaj Michalkoŭ i jahony syn, vajskoviec Jan Michalkoŭ razam ź inšymi vypusknikami zhadanaha kłuba byli aryštavanyja nakonadni 25 sakavika i abvinavačanyja ŭ «padrychtoŭcy masavych biesparadkaŭ». Nieŭzabavie ŭ haziecie «Sovietskaja Biełoruśsija» byŭ źmieščany prapahandyscki artykuł, a pa telekanale BT byŭ pakazany film, u jakich vychavancy kłuba vinavacilisia ŭ padrychtoŭcy «fašysckaha pieravarotu» na Dzień Voli ŭ Minsku z udziełam «terarysta-śmiarotnika». Svajaki i blizkija aryštavanych ličać spravu palityčna matyvavanaj i sfabrykavanaj śpiecsłužbami dla adciahnieńnia ŭvahi hramadstva ad sacyjalnych pratestaŭ, vyklikanych masavym biespracoŭjem i rezkim padzieńniem uzroŭniu žyćcia nasielnictva ŭ apošnija hady. Tym nie mienš, miascovyja pravaabaroncy nie śpiašajucca pryznavać aryštavanych patryjotaŭ palityčnymi źniavolenymi, matyvujučy heta «słaboj arhumientacyjaj dla vyznačeńnia charaktaru abvinavačańnia».
29 krasavika stała viadoma, što Jan Michalkoŭ byŭ vyzvaleny, umovy vyzvaleńnia nie ahučvalisia. Za kratami zastajucca 18 čałaviek, 16 ź ich vystaŭlenaje dadatkovaje abvinavačańnie pavodle artykuła 287 Kryminalnaha kodeksu («Stvareńnie niezakonnaha ŭzbrojenaha farmavańnia»).
U sacyjalnych sietkach praciahvajecca kampanija salidarnaści #PatryjotNieZłačynca, kaardynatary jakoj zaklikajuć dałučacca ŭsich nieabyjakavych ludziej i dapamahać aryštavanym i ich siemjam (Srodki ŭ BYN na kartku Biełarusbanka 4255190182607666, termin da 07/19, karystalnik Nina Shydlouskaya). U abaronu aryštavanych patryjotaŭ taksama vystupili šerah viadomych dziejačaŭ navuki, kultury i litaratury. U pryvatnaści, u kniharni «łohvinaŬ» prajšoŭ tvorčy marafon salidarnaści ź fihurantami «Spravy patryjotaŭ», a viadomy muzyka, lidar hurtu «Stary Olsa» Źmicier Sasnoŭski abviaściŭ ab stvareńni «Słužby dapamohi», zajaviŭšy: «Aryštavanyja «bajeviki» — maje siabry. Z usio adkaznaściu śćviardžaju: heta najlepšyja syny Biełarusi, sol našaha naroda».