«Svabodny teatar» baviŭ čas u Čechii
U malaŭničym miescy, la padnožža Tatraŭ, u lesie, prytulililisia dva damy, što naležać dvum siabram – režysioru Andreju Kroŭbu i dramaturhu Vacłavu Haŭłu.
11 žniŭnia biełaruski «Svabodny teatr» viarnuŭsia z češskaha Hradečka – miesca, dzie na praciahu bolš za 30 hod prachodziać tradycyjnyja teatralnyja sustrečy.
Ideja sustreč, što prachodzili ŭ maleńkim pasiołku, raźmieščanym u harach, naležyć dvum siabram – byłomu Prezidentu Čechii, dramaturhu Vacłavu Haŭłu i teatralnamu režysioru Andreju Kroŭbu.
U malaŭničym miescy, la padnožža Tatr, u lesie, prytulililisia dva damy, što naležać dvum siabram – režysioru Andreju Kroŭbu i dramaturhu Vacłavu Haŭłu. Siamja Kroŭbaŭ atrymała hety dom ŭ siaredzinie sarakavych hadoŭ, a paźniej, u siaredzinie šaścidziesiatych, pobač pabudavała svoj zaharadny dom siamja Haviełaŭ. Ale siabroŭstva Andreja Kroŭba i Vacłava Haŭła zasnavanaje nie tolki, i nie stolki, na tym, što jany žyli pobač, kolki na ahulnaści pohladaŭ na tvorčaść i svabodu.
Pieršyja sustrečy tvorčych ludziej u Hradečku stali adbyvacca ŭ pačatku 70-ch hadoŭ, kali ŭ Čechasłavakii, paśla ŭvarvańnia savieckich vojskaŭ, lutavała kamunistyčnaja dyktatura. Tady Kroŭb i Havał stali kožnaje leta na niekalki dzion źbirać u siabie ŭ haściach svabodalubnych dziejačoŭ kultury. Pad vyhladam dniej narodzinaŭ, viasiellaŭ i jubilejaŭ, rabilisia pakazy śpiektaklaŭ, kancerty, litaraturnyja čytańni. Tut upieršyniu hučali pjesy zabaronienych češskich dramaturhaŭ i pieśni muzykaŭ, jakija pieraśledvalisia. Uspaminajučy hety čas, Andrej Kroŭb kaža:
«U toj čas pravodzić padobnyja sustrečy było vielmi składana – my stała znachodzilisia pad psichałahičnym presinham. Napiaredadni čarhovaj sustrečy ŭvieś Hradečak byŭ akružany palicejskimi mašynami i hrupami ludziej u cyvilnym, – jany praviarali dakumienty, pierapisvali numary mašyn... Prysutnaść u Hradečku harantavała čałavieku trapleńnie ŭ «čornyja śpisy». Ja dumaju, što siońnia vy, biełarusy, jak nichto ź jeŭrapiejcaŭ, možacie sabie pradstavić, jak heta było – vašaja situacyja vielmi padobnaja z našaj situacyjaj tryccacihadovaj daŭniny. Z toj tolki roźnicaj, što za hety čas źjavilisia mabilnyja telefony i internet».
Cikava, što sustrečy ŭ Hradečku nie spynialisia i tady, kali Vacłaŭ Havał staŭ Prezidentam Čechii. Praŭda, z-za mocnaj zahružanaści, jon zmoh byvać na ich nie štohod.
Nie zmoh Havał prysutničać u Hradečku i sioleta, praŭda, pa inšaj pryčynie– padvioŭ stan zdaroŭja.
Na sustrečy hoda prysutničali viadomyja ŭ krainie palityki, muzyki, režysiory, akciory, dramaturhi, piśmieńniki.
Akramia biełaruskaha «Svabodnaha teatra», svaje pracy ŭ Hradečku pakazali dva češskich teatralnych kalektyva – z Prahi i Karłavych Var. Pražanie pradstavili kamiedyjnuju adnaaktaŭku «Furšet», a karłavarcy – śpiektakl pa adnaaktovaj pjesie Vacłava Haŭła «Pratest».
Śpiektakl «Pakaleńnie Jeans», syhrany na adkrytaj impravizavanaj placoŭcy prama ŭ lesie, byŭ vielmi ciopła sustrety publikaj. A finalnaja scena śpiektakla, u jakoj havorka idzie ab češskim studencie Janu Pałachu, jaki spaliŭ siabie na Vacłaŭskaj płoščy Prahi, pratestujučy suprać uviadzieńnia savieckich vojskaŭ u Čechasłavakiju, vyklikała ŭ hledačoŭ cełuju chvalu ŭspaminaŭ.