Jašče adzin biełarus staŭ medalistam Hulniaŭ
Bronzavym pryzioram Alimpijady ŭ spartovaj himnastycy ŭ składzie zbornaj ZŠA staŭ uradženiec Miensku Alaksandar Arciomjeŭ.
Bronzavym pryzioram Alimpijady ŭ spartovaj himnastycy ŭ składzie zbornaj ZŠA staŭ uradženiec Miensku Alaksandar Arciomjeŭ. Mienavita praktykavańnie Arciomjeva na kani stała adnym z vyrašalnych u pośpiechu amerykancaŭ, chacia kamanda lacieła ŭ Kitaj u statusie aŭtsajdera.
Himnast patrapiŭ u vyjazny skład zbornaj u apošniuju chvilinu, kali praz traŭmu ščykałatki na Alimpijadu nia zmoh pajechać Morhan Chem — brat‑bliźniuk alimpijskaha čempijonu Afinaŭ Poła Chema.
Alaksandar Arciomjeŭ naradziŭsia 29 žniŭnia ŭ stalicy Biełarusi, a jahony baćka Ŭładzimier Arciomjeŭ stanaviŭsia čempijonam SSSR pa spartovaj himnastycy ŭ šmatborstvie. Alaksandar pierajechaŭ ź siamjoj u ZŠA ŭ 1994 hodzie, a ŭ 2002 atrymaŭ hramadzianstva. Ciapier jon žyvie ŭ Denvery, štat Kałarada.
U 2006 hodzie Arciomjeŭ zavajavaŭ bronzu na čempijanacie ŭ praktykavańniach na kani, jakaja stała pieršaja dla kamandy ZŠA ad 1979 hodu.
«Ja ździejśniŭ maru svajho žyćcia. Hetaj nočču ja budu spać z medalom. Užo sam vychad našaj kamandy na Alimpijadu byŭ pośpiecham, a ciapier my vierniemsia ŭ Ameryku hierojami», — skazaŭ ščaślivy pryzior Alimpijady.