Francyja zajaviła pra niedatyčnaść Rasii da chakierskaj ataki na štab Makrona
Rasijskija chakiery niedatyčnyja da kibierataki na pieradvybarčy štab prezidenta Francyi Emaniuela Makrona padčas jaho niadaŭniaj vybarčaj kampanii.
Pra heta ŭ intervju Associated Press zajaviŭ kiraŭnik Nacyjanalnaha ahienctva biaśpieki infarmacyjnych sistem Francyi Hijom Pupar.
Pavodle Pupara, ataka była «nastolki prostaj», što ździejśnić jaje moh «chto zaŭhodna i adkul zaŭhodna». Pupar paćvierdziŭ, što jaho viedamstva taksama nie vyjaviła śladoŭ inšaj chakierskaj hrupoŭki, jakaja padazrajecca va ŭzłomach padčas prezidenckaj kampanii ŭ ZŠA.
U noč na 6 maja, napiaredadni druhoha turu prezidenckich vybaraŭ u Francyi, WikiLeaks apublikavała masiŭ dakumientaŭ pieradvybarčaha štaba Makrona. U štabie zajavili, što stali achviarami «skaardynavanaj chakierskaj apieracyi».