NASA dašle kaśmičny aparat da Sonca ŭ 2018 hodzie
NASA dašle kaśmičny aparat da Sonca, kab bolš daviedacca pra pryrodu soniečnych štormaŭ. Bieśpiłotny zond budzie znachodzicca za 6,5 młn kiłamietraŭ ad pavierchni Sonca, dzie tempieratura dasiahaje amal 1400 hradusaŭ pa Celsiju.
Aparat Parker Solar zmoža palepšyć razumieńnie roli Sonca dla čałaviectva, a taksama dapamahčy ŭ raspracoŭcy abstalavańnia dla abarony ad soniečnaj radyjacyi.
Dla taho, kab abaranić aparat ad ekstremalnych tempieratur, NASA raspracavała 114-milimietrovy ščyt. Sensary Parker Solar buduć analizavać elektronnyja čaścicy, a teleskopy aparata zrobiać fotazdymki pavierchni najbližejšaj zorki.
Soniečnaja radyjacyja zdolnaja vyvodzić sa stroju spadarožniki, parušać pracu GPS i navat stvarać pieraškody dla elektryčnych sietak. Na siońniašni dzień u navukoŭcaŭ niama dakładnaha razumieńnia taho, jak soniečnaje vypramieńvańnie dasiahaje Ziamli, tamu jany spadziajucca, što misija Parker Solar znojdzie adkazy na hetyja pytańni.
Lepšaje razumieńnie taho, što takoje soniečnaja radyjacyja i jak «kaśmičnaje nadvorje» ŭpłyvaje na Ziamlu, nieabchodna nie tolki dla abarony spadarožnikaŭ i elektraŭstanovak. Soniečnaja radyjacyja źjaŭlajecca śmiarotnaj dla čałavieka ŭ kosmasie, tamu pierad mahčymaj kałanizacyjaj Miesiaca i Marsa navukoŭcam nieabchodna raspracavać abaronu ad jaje.
Jašče navukoŭcy chočuć znajści adkaz na pytańnie, čamu tempieratura atmaśfiery Sonca bolš vysokaja, čym tempieratura jaho pavierchni.
Na siońniašni dzień kaśmičny aparat Helios 2 dabiraŭsia bližej za ŭsich da Sonca. Padčas misii ŭ 1976 hodzie aparat znachodziŭsia za 43 młn kiłamietraŭ ad pavierchni Sonca.
Zapusk Parker Solar adbudziecca na mysie Kanavierał u lipieni ci žniŭni 2018 hoda.