Navukoŭcy źviazali televizar u dziciačym pakoi z ryzykaj atłuścieńnia
Dzicia, u jakoha ŭ spalni staić televizar, z bolšaj imaviernaściu sutykniecca z atłuścieńniem, čym dzieci, jakija ŭłasnaha televizara nie majuć. Heta vyśvietlili navukoŭcy z univiersiteckaha kaledža Łondana, piša BBC.
Fota 3.bp.blogspot.com
Heta asabliva tyčycca dziaŭčynak, jakim praz deficyt ruchu bolš pahražaje atłuścieńnie.
Daśledčyki ciapier staviać pierad saboj zadaču vyśvietlić, ci jość takaja samaja zaležnaść pamiž atłuścieńniem i vykarystańniem kampjutaraŭ i mabilnych telefonaŭ.
Ryzyka atłuścieńnia raście
Ekśpierty adznačajuć, što doŭhija hadziny, praviedzienyja pierad teleekranam, pavyšajuć ryzyku dla dziciačaha zdaroŭja praz spałučeńnie roznych faktaraŭ.
Artykuł, apublikavany ŭ časopisie the International Journal of Obesity, hruntujecca na analizie dadzienych, atrymanych padčas abśledavańnia bolš za 12 tysiač dziaciej małodšaha ŭzrostu ŭ Brytanii.
Aŭtary vyjavili, što bolš za pałovu z abśledavanych dziaciej majuć televizary ŭ svaim pakoi ŭžo ź siami hadoŭ.
Baćkoŭ prasili taksama acanić, kolki hadzin u dzień dzieci pravodziać pierad televizaram.
Daśledavańnie pravodziłasia ciaham niekalkich hadoŭ. Kali dzieci dasiahnuli ŭzrostu 11 hadoŭ, daśledčyki zamierali indeks masy cieła (suadnosiny rostu da vahi) i dolu ŭtrymańnia ŭ arhaniźmie tłušču.
Akazałasia, što siarod dziaŭčynak, u jakich ź siami hadoŭ u spalni byŭ ustalavany televizar, na 30% čaściej sustrakałasia atłuścieńnie ŭ paraŭnańni ź dziećmi, u jakich nie było televizaraŭ.
Dla chłopčykaŭ hetaja ryzyka pavyšałasia prykładna na 20%.
«Naša daśledavańnie śviedčyć, što isnuje vyraznaja suviaź pamiž televizaram ŭ spalni dziciaci i atłuścieńniem praź niekalki hadoŭ», — zajaviła adna z aŭtaraŭ daśledavańnia doktar Hanna Chiejłman.
Daśledčyki kažuć, što nie viedajuć dakładna, čamu isnuje suviaź pamiž najaŭnaściu televizara i ryzykaj atłuścieńnia, ale miarkujuć, što zbolšaha heta tłumačycca deficytam snu i prychilnaściu da fast-fudu, jaki spažyvajecca padčas prahladu teleprahram.
Akramia taho, jany vykazvajuć zdahadku, što dziaŭčynki, jakija hladziać televizar, mienš fizična aktyŭnyja, čym chłopčyki ŭ tym ža ŭzroście.