Maryn Lo Pien paprasiła vybarcaŭ pazyčyć hrošy
Kiraŭnik francuzskich krajnie pravych zapuściła sajt «Patryjatyčnaja pazyka», na jakim źbiraje hrošy na finansavańnie pieradvybarnaj kampanii. Jak zajaviła Maryn Lo Pien u efiry Europe 1 u čaćvier, 1 červienia, ni adzin bank, ni francuzski, ni zamiežny, nie pahadziŭsia dać kredyt jaje partyi pierad parłamienckimi vybarami, piša RFI.
Maryn Lo Pien. Fota politeka.net
«Ja zapuskaju sajt, jaki nazyvajecca «Patryjatyčnaja pazyka», kab paprasić va ŭsich našych vybarcaŭ pazyčyć nam hrošy dla taho, kab my zmahli prafinansavać parłamienckija vybary, tamu što nam znoŭ admovili ŭsie banki», — zajaviła kiraŭnik francuzskich krajnie pravych.
Na sajcie, jaki zapuściła Maryn Lo Pien, tłumačycca, što Nacfront sutyknuŭsia «ź vielmi niespraviadlivaj situacyjaj finansavańnia palityčnych partyj». Kab pryciahnuć patencyjnych kredytoraŭ, «Nacyjanalny front» prapanuje «vielmi vyhadnuju staŭku pa kredycie: 3% hadavych».
Samych ščodrych kredytoraŭ čakajuć «ekskluziŭnyja prapanovy». Tyja, chto pazyčyć Nacfrontu bolš za 15 tysiač jeŭra, atrymajuć zaprašeńnie «na prestyžnaje mierapryjemstva ŭ prysutnaści Maryn Lo Pien». A «samyja zabiaśpiečanyja suajčyńniki», u jakich dla lubimaj partyi znojdziecca bolš za 75 tysiač jeŭra, zmohuć «asabista paviačerać z Maryn Lo Pien».
U vieraśni 2014 hoda partyja Lo Pien atrymała kredyt pamieram u 9 miljonaŭ jeŭra ŭ Pieršym Češska-Rasijskim Banku First Czech Russian Bank (FCRB). Kiraŭnik francuzskich krajnie pravych tłumačyła, što źviarnułasia pa kredyt u rasijski bank, pakolki francuzskija banki admovili jaje partyi ŭ kredytach.
Akramia taho, Nacfront zapytvaŭ kredyty jašče ŭ dvuch rasijskich finansavych arhanizacyjach: AKB «Stratehija» i «NKB». Usie try banki ŭ 2016 hodzie byli pryznanyja bankrutami i pazbavilisia licenzii Centrabanka. A ŭ dačynieńni da Pieršaha Češska-Rasijskaha banka ciapier viadziecca rasśledavańnie pa spravie machlarstva ŭ asabliva bujnym pamiery.