Dola MAZa na rasijskim rynku stała minimalnaj i źnižajecca dalej
Rasijskija pieravozčyki ŭ pieršym paŭhodździ zrabili staŭku na nabyćcio zachodniaj techniki. MAZ byŭ vymušany sastupić svaje pazicyi. Pra heta piša Tut.by sa spasyłkaj na dadzienyja analityčnaha ahienctva «Aŭtastat».
U pieršym paŭhodździ 2017 hoda abjom rynku novych hruzavych aŭtamabilaŭ u Rasii skłaŭ 31,5 tys. adzinak, što na 44,5% bolš, čym hodam raniej. Pry hetym u červieni rynak vyras jašče bolš — na 62,8% da 6,6 tys. štuk.
Lidaram rynku hruzavikoŭ pa-raniejšamu zastajecca KamAZ, na dolu jakoha pa vynikach studzienia-červienia pryjšłosia 35% ad ahulnaha abjomu. U kolkasnym vyražeńni heta adpaviadaje 11,2 tys. štuk — na 26,5% vyšej za vyni hadavoj daŭnaści. Na druhim miescy raźmiaščajecca jašče adzin rasiejski brend — HAZ, pakazčyk jakoha skłaŭ 3,5 tys. aŭtamabilaŭ (+ 5%). Zamykaje pieršuju trojku šviedski Volvo (2,1 tys. št.), abjom rynku jakoha vyras u 4,1 razu.
U piaciorku lidaraŭ z praktyčna roŭnymi pakazčykami taksama patrapili šviedskaja Scania (1,9 tys. št.; + 156,3%) i niamiecki Mercedes-Benz (1,9 tys. št.; + 309,1%).
Imklivyja tempy rostu prodažaŭ hetych zachodnich brendaŭ dazvolili im vycieśnić MAZ z treciaha miesca na šostaje.
U I paŭhodździ prodažy techniki Minskaha aŭtazavoda ŭ Rasii skłali 1,6 tys. hruzavych aŭtamabilaŭ, pavialičyŭšysia na 18,7%. Takim čynam, pa vynikach I paŭhodździa dola MAZa ŭ prodažach hruzavych aŭtamabilaŭ u Rasii skłała 5,2% (6,4% u I paŭhodździ 2016 hoda).
Pa dadzienych ekśpiertaŭ haziety «Viedomosti», rynak u cełym pierachodzić u bolš premijalny siehmient. Popyt padtrymlivajuć dziaržprahramy, ale šmat u čym sprava zaležyć ad kursu jeŭra, asabliva kali havorka zachodzić pra impart.