Biełaruś admoviłasia ad budaŭnictva druhoha kalijnaha kambinata ŭ Turkmienistanie
Kampanija «Biełhorchimpram», kantrolny pakiet akcyj jakoj naležyć «Biełaruśkaliju», admoviłasia ad budaŭnictva druhoha kalijnaha kambinata ŭ Turkmienistanie, choć u sakaviku zdała ŭ ekspłuatacyju taki abjekt. Pra heta paviedamiŭ žurnalistam hiendyrektar «Biełaruśkalija» Ivan Hałavaty.
U sakaviku byŭ uviedzieny ŭ ekspłuatacyju Harłykski horna-abahačalny kambinat — pieršy sumiesny kalijny prajekt Biełarusi i Turkmienistana. «Biełhorchimpram» i kancern «Turkmienchimija» zadumali budaŭnictva kambinata vytvorčaj mahutnaściu 1,4 miljona ton chłorkaliju ŭ hod u 2010 hodzie. Adnak z-za ŭzajemnych paprokaŭ daviali jaho da ładu tolki ŭ 2017 hodzie. Košt prajekta aceńvaŭsia ŭ 1 młrd dalaraŭ.
Paśla hetaha turkmienskija ŭłady vykazali žadańnie ŭźvieści jašče adzin anałahičny kambinat. Byŭ abvieščany tendar na budaŭnictva Karabilskaha hornarudnaha kalijnaha kompleksu pa vytvorčaści chłarydu kalija koštam 1,4 młrd dalaraŭ. Paźniej Alaksandr Łukašenka zajaviŭ, što Biełaruś moža padać zajaŭku na ŭdzieł u konkursie. Tym bolš pastupiła prapanova pabudavać HAK ad prezidenta Turkmienistana. Apošni termin padačy tendarnych prapanoŭ byŭ 26 červienia 2017 hoda.
«My nie nakiroŭvali zajaŭku», - skazaŭ žurnalistam Ivan Hałavaty, udakładniŭšy, što kampaniju nie zadavolili ŭmovy, jakija prapanavali ŭłady Turkmienistana.