U ZŠA zaviaršyłasia vaśmimiesiačnaja imitacyja žyćcia na Marsie
Navukoŭcy z univiersiteta Havajskich vyspaŭ zajavili ab paśpiachovym zaviaršeńni vaśmimiesiačnaha izalacyjnaha ekśpierymientu HI-SEAS na schiłach hary Maŭna-Łoa, jaki imitavaŭ žyćcio na marsijanskaj bazie, paviedamlaje Space.com.
«My pakazali, što doŭhaterminovyja kaśmičnyja ekśpiedycyi źjaŭlajucca absalutna mahčymymi dla nas. Viadoma, isnujuć i techničnyja, i psichałahičnyja faktary, jakija nam jašče treba pieraadoleć, u tym liku i z dapamohaj HI-SEAS, ale ŭsie jany vyrašalnyja, kali my prykładziem dosyć šmat namahańniaŭ», — zajaviła Łora Łark, adna z udzielnic prajekta.
Ekśpierymient HI-SEAS adroźnivajecca ad mnohich izalacyjnych daśledavańniaŭ, u tym liku rasijskaha «Marsa-500», tym, što ŭdzielniki jaho «ekipaža» imitujuć nie palot da Marsa abo Miesiaca, a žyćcio na ich pavierchni ŭ pastajannaj bazie. Udzielniki prajektu mohuć pakinuć miežy bazy ŭ luby momant, praŭda, dla hetaha im daviadziecca nadzieć skafandr.
Žyćcio na bazie, jak raspaviadaje pres-słužba ŭniviersiteta, maksimalna nabližanaje da marsijanskaha: isnuje 20-chvilinnaja zatrymka ŭ suviazi z «Ziamloj», udzielniki ekśpiedycyi atrymlivajuć vadu i pradukty tolki adzin raz u niekalki miesiacaŭ, i vykonvajuć usie miery biaśpieki, jakija mohuć prymianiacca pry stvareńni bazy NASA na Marsie.
Dadzieny prajekt spansujecca NASA ŭžo piać hadoŭ, i ŭ jaho ramkach było praviedziena ŭžo čatyry «ekśpiedycyi» na Mars, jakija praciahvalisia ad niekalkich miesiacaŭ da hoda. Apošni taki ekśpierymient zaviaršyŭsia ŭ žniŭni 2016 hoda, a hety ekśpierymient pačaŭsia naprykancy lutaha.
U im brali ŭdzieł čatyry mužčyny i dźvie žančyny, jakija pahadzilisia pravieści ŭ poŭnaj izalacyi ad astatniaha śvietu vosiem miesiacaŭ. Siarod ich jość jak prafiesijnyja navukoŭcy (bijołah, inžynier-rakietčyk i śpiecyjalist u daśledavańni kosmasu), tak i prostyja dobraachvotniki — prahramistka z Google, inžynier z kampanii «Boinh» i piśmieńnik-fryłansier.
U ramkach biahučaj ekśpiedycyi navukoŭcy zrabili ŭpor na aŭtanomnaść žyćcia na Marsie i praviadzieńni navukovych daśledavańniaŭ pavierchni «čyrvonaj płaniety». Vyniki hetych ekśpierymientaŭ, jak spadziajucca ŭ NASA, dapamohuć padrychtavacca da stvareńnia realnaj bazy na Marsie abo Miesiacy.
Darečy, chutka pačniecca nabor kandydataŭ dla novaha ekśpierymientu.