Tramp pryhraziŭ KNDR poŭnym źniščeńniem
Prezident ZŠA Donald Tramp, upieršyniu vystupajučy ŭ AAN, zrabiŭ rezkija zajavy ŭ adras krain, jakija nazvaŭ «dziaržavami-izhojami». U pryvatnaści, jon paabiacaŭ całkam źniščyć KNDR u vypadku, kali jana stanie ŭjaŭlać realnuju pahrozu dla jaho krainy, a taksama vykazaŭsia ab Iranie i Vieniesuele, paviedamlaje VVS.
«Siońnia bič našaj płaniety — maleńkaja hrupa krain-izhojaŭ, jakija parušajuć kožny z pryncypaŭ, na jakich zasnavanaja AAN. Jany nie pavažajuć ni pravy svaich hramadzian, ni suvierennyja pravy svaich krain. Kali bolšaść, uzbrojenaja dabradziejnaściu, nie ŭstanie na šlachu ŭ niekalkich zładziejaŭ, to zło pieramoža», — skazaŭ Tramp.
Tramp rastłumačyŭ, što kazaŭ u pieršuju čarhu ab Paŭnočnaj Karei. Kirujučy režym u KNDR «niasie adkaznaść za hałodnuju śmierć miljonaŭ žycharoŭ Paŭnočnaj Karei i za źniavoleńnie, katavańni, zabojstvy i pryhniot nieźličonaj kolkaści inšych», ličyć jon.
Prezident ZŠA pryvioŭ u jakaści prykładu historyju amierykanskaha studenta Ota Uormbira, jaki pajechaŭ u KNDR na kanikuły, ale byŭ aryštavany tam za sprobu skraści ahitacyjny płakat.
Uormbir byŭ prysudžany ŭ KNDR da 15 hadoŭ turmy, ale pravioŭ u źniavoleńni 15 miesiacaŭ, paśla čaho byŭ viernuty ŭ ZŠA ŭ stanie komy i nieŭzabavie pamior.
«U ZŠA — vialikaja siła i ciarplivaść, ale kali my vymušanyja budziem abaraniacca, to ŭ nas nie budzie inšaha vybaru, akramia jak całkam źniščyć KNDR. Čałaviek-rakieta raspačaŭ samahubčuju misiju», — dadaŭ prezident ZŠA, kažučy pra lidara KNDR Kim Čen Yna, pry jakim kraina praviała niekalki rakietnych puskaŭ.