Mienščyna – lider pa kolkaści samahubstvaŭ
A ŭ cełym u Biełarusi nazirajecca skaračeńnie suicydaŭ. My ŭžo nia ŭ liderach. Sumnaje pieršynstvo trymaje Litva, druhaja — Rasieja.
U Biełarusi nazirajecca skaračeńnie kolkaści samahubstvaŭ. Pra heta paviedamiŭ na pres‑kanferencyi, pryśviečanaj Suśvietnamu dniu papiaredžańnia samahubstvaŭ dacent kafedry psychijatryi i narkalohii Biełaruskaj medycynskaj akademii paśladyplomnaj adukacyi (BiełMAPA) Jaŭhien Łasy.
Pa jaho słovach, pik suicydaŭ u historyi niezaležnaj Biełarusi naziraŭsia ŭ 1996 hodzie,kali na 100 tysiačaŭ žycharoŭ krainy zafiksavali 35,8 vypadkaŭ.
U minułym hodzie hetaja kolkaść skaraciłasia da 27,5 vypadkaŭ. Dla paraŭnańnia — siarednieeŭrapiejski pakazčyk składaje 17,5 vypadkaŭ na 100 tysiač žycharoŭ, u siarednim u śviecie — 16 vypadkaŭ.Mužčyny robiać sabie śmierć prykładna ŭ šeść razoŭ čaściej za žančynaŭ. Čaściej za ŭsio heta asoby ŭ pracazdolnym vieku, na druhim miescy — pensijanery. Biełarusy ŭ stałym vieku najpierš nakładajuć na siabie ruki z‑za depresii i alkahalizmu. Na pieršym miescy pa kolkaści samahubstvaŭ znachodzicca Mienščyna — 38,2 vypadki na 100 tysiač žycharoŭ, najmienšaja kolkaść vypadkaŭ zafiksavanaja na Homielščynie — 28,5.
Prablema samahubstvaŭ nia jość unikalnaściu Biełarusi, śćviardžaje medyk. Tendencyja da źnižeńnia ich kolkaści charakternaja taksama i dla susiednich krainaŭ.
Matyvami dla suicydaŭ siarod dziaciej i padletkaŭ čaściej za ŭsio źjaŭlajucca pratest suprać despatyčnych baćkoŭ, zaklik da dapamohi, pryciahnieńnie ŭvahi. Pavodle hałoŭnaha pazaštatnaha dziciačaha psychijatra Ministerstva achovy zdaroŭja, supracoŭnicy BiełMAPA Iny Piatnickaj, surjoznym faktaram tut jość i praźmiernyja nahruzki ŭ škole. Pavodle jaje infarmacyi ŭ minułym hodzie było zafiksavana 29 vypadki samahubstvaŭ — 1,5 na 100 tysiač dziciačaha nasielnictva. Adnoj z prablemaŭ prafilaktyki parasuicydaŭ (niezavieršanych sprobaŭ) źjaŭlajecca niežadańnie amal pałovy paciarpiełych źviartacca pa dapamohu da medykaŭ, paviedamiła hałoŭny pazaštatny psychaterapeŭt Ministerstva achovy zdaroŭja Iryna Bajkova. Ludzi paprostu bajacca, abo saromiejucca źviartacca ŭ specyjalizavanyja ŭstanovy. Z ulikam hetaha ŭ haradzkich paliklinikach i balnicach byli adčynienyja psychaterapeŭtyčnyja kabinety, što dało zaŭvažny plon, kaža spn. Bajkova.
Vyrašeńnie prablemy suicydaŭ nia jość vyklučna zadačaj medykaŭ i pryčyny ich tojacca nia tolki ŭ stanie zdaroŭja takich asobaŭ. Takuju dumku vykazaŭ hałoŭny ŭrač Respublikanskaj kliničnaj psychijatryčnaj balnicy (RKPB) Ŭładzimier Sklema. Prablema nosić ahulnadziaržaŭny charaktar — i sacyjalny, i ekanamičny, i medyčny. I vyrašać jaje taksama treba ŭ kompleksie, upeŭnienyja supracoŭniki BiełMAPA. U RKPB na siońnia majucca kojka‑miescy dla tych, chto ździejśniŭ sprobu samahubstva. Za hod praz hetuju ŭstanovu prachodzić da troch tysiačaŭ čałaviek.
Infarmavańnie nasielnictva jość adnym z nakirunkaŭ pracy pa papiaredžańni samahubstvaŭ. U kožnaj balnicy stvoranyja infarmacyjnyja stendy z kantaktnaj infarmacyjaj, u kožnaj škole možna źviarnucca pa svoječasovuju dapamohu da specyjalistaŭ. U ideale varta stvaryć u kožnym bujnym horadzie centry psychijatryčnaj dapamohi, miarkuje U.Sklema. Takija centry pačali źjaŭlacca ŭ susiedniaj Rasiei.