Adpaviednyja miescy z zaprašeńniem pačakajuć
Mierkavany vizyt ministra zamiežnych spravaŭ Siarhieja Martynava ŭ Paryž na sustreču «trojki» Eŭrasajuzu nie adbudziecca. Jak paviedamili ŭ MZS Francyi, zaprašeńnie Martynava budzie zaležać ad demakratyčnaści vybaraŭ 28 vieraśnia. Bolš za toje, u sieradu ministar zamiežnych spravaŭ Halandyi Maksim Verchahien (na fota) zapatrabavaŭ pazbavić Martynava šenhienskaj vizy.
Ministar zamiežnych spravaŭ Halandyi Maksim Verchahien
zapatrabavaŭ pazbavić Siarhieja Martynava šenhienskaj vizy.
Mierkavany vizyt ministra zamiežnych spravaŭ Siarhieja Martynava ŭ Paryž na sustreču «trojki» Eŭrasajuzu nie adbudziecca. Jak paviedamili BiełaPANu ŭ MZS Francyi, ministry zamiežnych spravaŭ Eŭrasajuzu prymuć rašeńnie pra zaprašeńnie Martynava tolki ŭ zaležnaści ad demakratyčnaści vybaraŭ 28 vieraśnia. Bolš za toje, u sieradu ministar zamiežnych spravaŭ Halandyi Maksim Verchahien zapatrabavaŭ pazbavić Siarhieja Martynava šenhienskaj vizy. Heta dyplamatyčny adkaz ES na niedyplamatyčnyja zajavy Alaksandra Łukašenki ŭ paniadziełak.
Nahadajem, što 9 vieraśnia rasiejskaje ahienctva RIA «Novosti» raspaŭsiudziła navinu, što Martynaŭ budzie zaprošany ŭ Paryž dla sustrečy z pradstaŭnikami «trojki» ES, jakuju planujecca pravieści ŭ miežach čarhovaha pasiedžańnia kiraŭnikoŭ MZS krainaŭ Eŭrasajuzu.
Pra heta nibyta paviedamiŭ pradstaŭnik pres-słužby eŭrakamisarki pa zamiežnych suviaziach i eŭrapiejskaj palitycy susiedztva Benity Ferery-Valdner.
Paviedamlałasia, što Martynaŭ maje pravieści pieramovy z Fereraj-Valdner, a taksama ministram zamiežnych spravaŭ Francyi Bernaram Kušneram (jahonaja kraina staršyniuje ŭ ES u hetym paŭhodździ) i viarchoŭnym pradstaŭnikom ES pa zamiežnaj palitycy i biaśpiecy Chaŭjeram Salana.
Naziralniki razhladali mahčymaść padobnaj sustrečy jak pieršy krok na šlachu źniaćcia Eŭrasajuzam palityčnaj blakady Biełarusi, što doŭžycca ŭžo čatyry hady. Sankcyi raspaŭsiudžvajucca na 41 pradstaŭnika biełaruskaj administracyi, u tym liku A.Łukašenku. Im zabaronieny ŭjezd u ES, zamarožanyja ichnyja aktyvy.
Adnak u sieradu 10 vieraśnia ministar zamiežnych spravaŭ Halandyi Maksim Verchahien niečakana zapatrabavaŭ pazbavić Siarhieja Martynava šenhienskaj vizy. Kali parlament adobryć hetuju inicyjatyvu, to pradstaŭnik aficyjnaha Miensku nia zmoža ŭjaždžać na terytoryja Eŭrasajuzu.
Verchahien upeŭnieny, što sankcyi suprać Biełarusi zdymać zarana, bo ŭ krainie ŭsio jašče nie pavažajucca pravy čałavieka.
«Halandyja adnosicca da tych krain, jakija žorstka adnosiacca da režymu Łukašenki. Ichniaja pazycyja jašče raz moža śviedčyć, što asablivaj narmalizacyi adnosinaŭ tak i nie nastupiła. Nie vyklučaju, što takija słovy kiraŭnika MZS Halandyi mahli stać vynikam paniadziełkavaj pres-kanferencyi A.Łukašenki, dzie kiraŭnik dziaržavy dapuściŭ niekalki abraźlivych vykazvańniaŭ na adras Zachadu», — kaža analityk Raman Jakaŭleŭski.
8 vieraśnia na sustrečy z rasijskimi žurnalistami Alaksandra Łukašenka zvykła malavaŭ Zachad u vobrazie cyničnaha voraha. Akramia hetaha, jon dapuściŭ niekalki niedyplamatyčnych vyrazaŭ na adras ZŠA i Eŭropy, zajaviŭšy, u pryvatnaści: «Nas usio adno nie zrazumiejuć, kolki b my ni całavali Zachad u adpaviednyja miescy».
Infarmacyja pra mahčymaje zaprašeńnie ministra Martynava i admienu sankcyj suprać Biełarusi ŭpieršyniu źjaviłasia ŭ subotu. Kiraŭniki dyplamatyčnych viedamstvaŭ krainaŭ ES sfarmulavali jaje ŭ subotu ŭ Avińjonie. Inicyjataram dyskusii vystupiła Polšča. Ministar zamiežnych spravaŭ hetaj krainy Radasłaŭ Sikorski zajaviŭ: «Ja miarkuju, što my pavinny paskoryć pryniaćcie hetaha rašeńnia, bo sytuacyja źmianiajecca. Palitviaźniaŭ bolš niama. Havorka pra toje, kab pravieści dyskusiju pa vypracoŭcy darožnaj karty narmalizacyi adnosinaŭ ź Biełaruśsiu», — dadaŭ jon.
Jon arhumentavaŭ prapanovu tym, što ES niadaŭna źniaŭ sankcyi z Kuby, dzie zastajecca amal 300 palitviaźniaŭ, a suprać Biełarusi sankcyi zachoŭvaje.
«U paraŭnańni z Kubaj Biełaruś, choć jana jašče j dalokaja ad našych standartaŭ, maje našmat svabadniejšy režym, u jakim možna vieści biznes, možna padarožničać i niama palityčnych viaźniaŭ», — skazaŭ Sikorski.
Jasnyja syhnały pra svaju hatoŭnaść narmalizavać adnosiny ź Biełaruśsiu rabili nia tolki eŭrapiejcy, ale i amerykancy. I pieršyja, i druhija davali zrazumieć, što dziela padtrymki niezaležnaści Biełarusi va ŭmovach rasijskich imperskich pretenzij jany hatovyja supracoŭničać navat z Łukašenkam pry zachavańni im minimumu prystojnaści.
Jak u piatnicu paviedamili «Našaj Nivie» ŭ pres-słužbie pasolstva ZŠA ŭ Miensku, ministerstva finansaŭ hetaj krainy źniało na šeść miesiacaŭ sankcyi suprać pradpryjemstvaŭ «Lakafarba» i «Škłovałakno». Heta stała mahčyma paśla taho, jak aficyjny Miensk pajšoŭ na vyzvaleńnie palitviaźniaŭ. Krok vitaŭsia Vašynhtonam jak pazytyŭny.
Nie vyklučałasia, što admienaj sankcyj suprać dvuch hetych pradpryjemstvaŭ sprava nie abmiažujecca, i amerykanskija ŭłady abvieściać ab novych sastupkach u ekanamičnaj sfery. Majecca na ŭvazie razmarožvańnie rachunkaŭ «Biełnaftachimu», ale tut jašče niama kankretyki.
Nahadajem, što sankcyi suprać lidzkaj «Lakafarby» i połackaha «Škłovałakna» byli ŭviedzienyja 15 traŭnia ŭ dadatak da ekanamičnych sankcyj u dačynieńni da kancernu «Biełnaftachim».
Varta adznačyć, što na pazaminułym tydni Miensk naviedvaŭ namieśnik pamočnika dziaržsakratara ZŠA ŭ spravach Eŭropy i Eŭrazii Devid Merkieł.
Eŭrasajuz nastojvaje, što samym važnym testam dla Biełarusi buduć zaraz vybary 28 vieraśnia.Pytańnie zaprašeńnia Martynava budzie vyrašanaje ŭ zaležnaści ad demakratyčnaści ich praviadzieńnia.