Dzieviać hadoŭ tamu biaśśledna źnikli Viktar Hančar i Anatol Krasoŭski
6 vieraśnia 1999 hoda biasśledna źnikli palityk Viktar Hančar i pradprymalnik Anatol Krasoŭski.
Viečaram 16 vieraśnia jany byli ŭ łaźni, što ŭ Minsku pa vulicy Fabryčnaja, 20. Prykładna ŭ 22.35 abodva vyjšli z budynka, sieli ŭ aŭtamašynu «Džyp‑Čeroki», što naležała Krasoŭskamu, paśla čaho ich bolš nie bačyli.
Jak paviedamlała prakuratura, jakaja raspačała kryminalnuju spravu pa fakcie źniknieńnia V.Hančara i A.Krasoŭskaha,
pry ahladzie prylehłaj terytoryi byli znojdzieny askołki płastmasavych raśsiejvalnikaŭ śviatłosihnalnych pryboraŭ aŭtamabila impartnaj vytvorčaści, ślady tarmažeńnia aŭtamašyny i jaje ŭdaru ab dreva, a taksama ślady kryvi.
Pa ŭziatych ź miesca zdareńnia abjektach praviedzieny ekśpiertyzy. Vyniki hienatypaskapičnaj ekśpiertyzy śviedčać ab tym, što pachodžańnie znojdzienych na miescy zdareńnia śladoŭ kryvi ad Krasoŭskaha vyklučajecca, a stupień vierahodnaści vysnoŭ ab pachodžańni plam kryvi ad Hančara składaje 99,6%. Analiz sabranych pa spravie dokazaŭ, u tym liku i pakazańniaŭ śviedak, daje padstavu mierkavać, što Hančar i Krasoŭski byli nasilna vykradzieny nieviadomymi asobami.
Biełaruskaja i mižnarodnaja hramadskaść ličyć, što V.Hančar i A.Krasoŭski byli vykradzieny pa palityčnych matyvach, i padazraje ŭ datyčnaści da ich vykradańnia vyšejšych słužbovych asob Biełarusi.
Juryst Hary Pahaniajła paviedamiŭ, što spravy ab źniknieńni Hančara i Krasoŭskaha nie zakryty. «Śledstva kožny raz praciahvajecca abo hienieralnym prakurorom, abo jaho namieśnikami. Adnak nijakich novych faktaŭ rasśledavańnie nie pryvodzić, i faktyčna možna kazać ab tym, što śledstva nasamreč nie viadziecca», — zaznačyŭ H.Pahaniajła.
Na dumku pravaabaroncy, heta adbyvajecca pa dźviuch pryčynach: pa‑pieršaje, kab pakazać na mižnarodnym uzroŭni toje, što rasśledavańnie «hučnych źniknieńniaŭ» usio‑taki pravodzicca, a pa‑druhoje, kab zaciahnuć hetyja rasśledavańni da zakančeńnia terminu daŭniny. «Heta prafanacyja i biaździejańnie ŭład u pošukach vinavatych», — zajaviŭ H.Pahaniajła.
«My ŭpeŭnieny, što da źniknieńnia palityka i biźniesmiena majuć dačynieńnie ludzi, jakija zajmajuć pasady ŭ vyšejšych ešałonach ułady. Adnak usie chadajnictvy svajakoŭ ab dopycie hetych asob adchilalisia prakurorami, jakija nahladajuć za chodam spravy, a sudy nie prymali da razhladu skarhi na dziejańni prakuroraŭ jak niepadviedamasnyja sudu. Adpaviedna, padazreńni ab datyčnaści da hetaha vykradańnia vyšejšych čynoŭnikaŭ tolki ŭmacoŭvajucca», — skazaŭ H.Pahaniajła.