U viaźnia Emanuiła Zelcera pamierła maci
Advakat Dźmitryj Haračka maje namier prasić Viarchoŭny sud Biełarusi ab źmianieńni miery strymańnia svajmu padabaronnamu.
16 vieraśnia advakat Dźmitryj Haračka maje namier padać u Viarchoŭny sud Biełarusi zvarot z prośbaj ab źmianieńni miery strymańnia amierykanskamu jurystu Emanuiłu Zielceru ŭ suviazi sa śmierciu jaho maci.
Jak advakat paviedamiŭ BiełaPAN, pa prośbie svajho klijenta jon maje namier damahacca źmianieńnia miery strymańnia na «nie źviazanaje z pazbaŭleńniem voli». D.Haračka nahadaŭ, što 26 vieraśnia Viarchoŭny sud razhledzić jaho kasacyjnuju skarhu ab apraŭdańni Zielcera ŭ suviazi ź jaho nievinavataściu.
U razmovie z karespandentam BiełaPAN brat asudžanaha Mark Zielcer raskazaŭ, što ich maci,
92‑hadovaja Bierta Zielcer, pamierła 16 vieraśnia.U červieni jana źviarnułasia da prezidenta Biełarusi Alaksandra Łukašenki i zaklikała «vyratavać žyćcio jaje syna», nie admaŭlać u žyćciova nieabchodnych lekach. «Nijakaha adkazu na zvarot my nie atrymali», — skazaŭ M.Zielcer.
Nahadajem, Emanuił Zielcer i jaho sakratar hramadzianka Rasii Uładlena Funk byli zatrymanyja ŭ Nacyjanalnym aeraporcie «Minsk» 12 sakavika. Praces pa ich kryminalnych spravach prachodziŭ z 30 lipienia pa 11 žniŭnia ŭ zakrytym režymie. Za vykarystańnie zaviedama falšyvych dakumientaŭ i zamach na kamiercyjny špijanaž E.Zielcer byŭ pryhavorany da troch hadoŭ pazbaŭleńnia voli, U.Funk — da adnaho.
Amierykanskamu hramadzianinu taksama inkryminavałasia kantrabanda narkatyčnych srodkaŭ, ale sud apraŭdaŭ jaho, nie pryznaŭšy narkotykami tabletki, jakija E.Zielcer užyvaje apošnija 15 hadoŭ. Ułady ZŠA damahajucca vyzvaleńnia asudžanaha pa humannych mierkavańniach, pakolki jaho zdaroŭje značna pahoršyłasia ŭ niavoli bieź lekaŭ, što prapisany jaho ŭračom. Tak, na čaćviorty pavierch u pamiaškańnie, dzie prachodziŭ praces, E.Zielcera kanvoj zanosiŭ na rukach, pakolki jon byŭ nie ŭ stanie samastojna iści pa leśvicy.
U žniŭni pasolstva ZŠA pieradało biełaruskim uładam usie nieabchodnyja leki, adnak ich nie pieradali E.Zielceru.