Łukašenka: Ministry razam z hubiernatarami falsifikujuć chod i vyniki ŭboračnaj kampanii?
Pra heta kiraŭnik krainy raspavioŭ siońnia, zasłuchoŭvajučy dakład ab realizacyi norm ukaza №253 «Ab mierach pa finansavym azdaraŭleńni sielskahaspadarčych arhanizacyj» i prapanavanych u jaho źmienach, piša BiełTA.
Jon pacikaviŭsia, jak na miescach vykonvajecca ŭkaz №253. «Jaki vynik ad hetaha ŭkaza, a hałoŭnaje — ci źniziłasia kolkaść niepłaciežazdolnych haspadarak, ci pavysiłasia efiektyŭnaść sielhasvytvorčaści?» — zapytaŭ kiraŭnik dziaržavy.
Asobna na naradzie kiraŭnik dziaržavy spyniŭsia na pytańniach zaviaršeńnia ŭboračnaj kampanii, adznačyŭšy, što, pa zapeŭnieńniach słužbovych asob urada i Minsielhascharča, jana pavinna była zaviaršycca da 7 listapada. «Što na siońniašni dzień? Chacieŭ by pačuć adkaz na hetaje pytańnie. Kryj boža, kali ja zamiest infarmacyi atrymaju dezinfarmacyju.
Ja maju na ŭvazie tuju infarmacyju, jakuju mnie niadaŭna pradstaviŭ KDK, pa jakoj ci ministry nie vałodajuć stanoviščam u sielskaj haspadarcy, abo naŭmysna razam z hubiernatarami falsifikujuć chod i vyniki ŭboračnaj kampanii», — papiaredziŭ Alaksandr Łukašenka.
Kiraŭnik dziaržavy spytaŭ, jak rychtujecca hleba pad uradžaj nastupnaha hoda, što z nazapašvańniem minieralnych uhnajeńniaŭ i jak zabiaśpiečana zimoŭka žyvioły.
«Žyćcio nie zakančvajecca 2017 hodam, tamu uradžaj budučaha zakładvajecca ŭžo siońnia. Chaciełasia b viedać, jak vy bačycie pierśpiektyvy 2018 hoda», - skazaŭ jon.