3000 rubloŭ za smartfon: u Biełarusi startavali prodažy iPhone X
Siońnia, 8 śniežnia, u Biełarusi pačalisia aficyjnyja prodažy iPhone X - samaha prasunutaha i darahoha smartfona Apple. Niahledziačy na toje, što naša kraina ŭvajšła ŭ trojku dziaržaŭ, dzie Phone X kaštuje daražej za ŭsio, heta nie spyniaje biełarusaŭ ad nabyćcia najnoŭšych pryład amierykanskaj kampanii.
Aficyjnyja prodažy iPhone X startavali 8 śniežnia pa ŭsioj Biełarusi — u aŭtaryzavanych reseleraŭ, u tym liku i-Store i CafeConnect, u ofisach sotavych apierataraŭ velcom i MTS, a taksama ŭ bujnych handlovych sietkach, naprykład, «Suviaznym» i «5 elemiencie».
U Biełarusi dastupnyja iPhone X va ŭsich kalarovych vykanańniach — sierabrystym i «šerym kosmasie».
Košt iPhone X z 64 HB — 2999 rubloŭ. Pryłada z abjomam pamiaci 256 HB budzie kaštavać 3449 rubloŭ. Nahadajem, siaredni zarobak u Biełarusi ŭ kastryčniku skłaŭ 841 rubiel.
Zrešty, pradaŭcy imknucca niejak kampiensavać takuju canu. Tak, u i-Store prapanujuć zabrać stary smartfon Apple pa prahramie trade-in, a sotavyja apieratary pradajuć hadžety ŭ rasterminoŭku da dvuch hadoŭ i dajuć u nahruzku hihabajty trafiku.