Viktar Prakapienia: 10 punktaŭ pra błokčejn
10-ju historyjami vakoł błokčejna, jakimi jon padobny na internet u kancy 90-ch, padzialiŭsia ŭ fejbuku IT-biznesmien Viktar Prakapienia.
Mnohija historyi, jakija adbyvajucca siońnia vakoł błokčejna, vielmi padobnyja na toje, što adbyvałasia vakoł internetu ŭ kancy 90-ch. Paraŭnańnie, viadoma, sprečnaje, ale vyhladaje cikava, bo i taja, i druhaja technałohii pra decentralizacyju.
1. Internet sparadziŭ vialikuju kolkaść zusim niečakanych miljanieraŭ i miljarderaŭ, taksama jak i błokčejn siońnia. Najlepšy aniekdot na temu — u malunku.
2. Internet byŭ dzika pavolnym. Taksama jak i ciapier biahučyja praktyčnyja prymianieńni błokčejna. Dastatkova było zapuścić kocikaŭ, kab patapić eteryum. Cikava, što siońnia my amal nie vykarystoŭvajem soft, napisany ŭ kancy 90-ch. Roŭna jak i, mabyć, budzie spraviadliva skazać, što ŭvieś soft, napisany dla prymianieńnia błokčiejna, naŭrad ci budzie vykarystoŭvacca praz 20 hadoŭ. Idei zastajucca, u toj čas jak kankretnaj realizacyi treba prajści šmat iteracyj, pierš čym heta stanovicca mas-markietam.
3. Hety cudoŭny vyraz tvaru tych, kamu ty tłumačyš, što takoje błokčejn, siońnia absalutna identyčny z tym, jaki naziraŭ u kancy 90-ch, kali raspaviadaŭ što takoje internet. (Tak ja drenna tłumaču.) Cikava, što siońnia nikomu nie treba tłumačyć, što takoje internet.
4. Vialikaja kolkaść ašukancaŭ i ŭ kancy 90-ch vakoł internetu, jak i siońnia vakoł błokčejna. Heta nie aznačaje, što jak tady, tak i ciapier niama prystojnych ludziej vakoł technałohij, jakija ja paraŭnoŭvaju.
5. Burbałka dot komaŭ i šmatlikija burbałki vakoł błokčejna. Rynak nie razumieŭ, jak aceńvać anłajn-kampanii, taksama jak i nie ŭjaŭlaje, jak možna aceńvać sposaby prymianieńnia błokčejna. Siońnia try vienčurnyja kapitalisty plus minus 30 pracentaŭ aceniać startap biez vyručki amal na luboj stadyi.
6. Naohuł nie zrazumieła było, kudy heta ŭsio nas pryviadzie i jak heta źmienić žyćcio. Taksama i siońnia z błokčejnam.
7. Jak i błokčejn siońnia, tak i ŭsiakija historyi vakoł prymianieńnia internetu byli absalutna nie praduhledžany zakanadaŭstvam. Prava zaŭsiody adstaje ad žyćcia. Razvahi ab pravie vakoł internetu ŭ tyja hady ŭvodzili ŭ stupar amal luboha jurysta, taksama jak i zaraz adbyvajecca z błokčejnam.
8. Razvahi pra internet u kancy 90-ch bolšaści tych, chto dumaŭ, što razumieje, što heta, byli padobnyja na razvahi padletkaŭ pra seks — nichto im nie zajmaŭsia, ale zatoje ŭsio pra jaho havorać. Toje samaje robicca vakoł błokčejna siońnia: ludzi, načytaŭšysia prostych artykułaŭ, robiać vysnovy pra budučyniu vykarystańnia technałohii. Adzinyja, chto pastupova razumieli maštab taho, jakim čynam internet źmienić śviet u kancy 90-ch, byli tyja, chto jaho bolš za ŭsio vykarystaŭ. Mahčyma, padobnaje ciapier adbyvajecca i z błokčejnam.
9. Vielmi modna było skazać: ja vyjšaŭ u internet. Taksama jak ciapier modna skazać: ja kupiŭ bitkoin.
10. I tady, i ciapier było mora retrahradaŭ, jakija kazali, što ŭsio heta tryźnieńnie — treba ŭsio zabaranić i ŭsich rasstralać. Karysnaj infarmacyi ŭ ŚMI tady pra internet, jak i zaraz pra błokčejn, vielmi mała.
Adnak prajšło 20 hadoŭ. Usie vyšejapisanyja prablemy prymianieńnia internetu byli paśpiachova vyrašany supolnaściu i nikomu ŭ hałavu nie prychodzić, što internet heta tolki dla varjataŭ, hihaŭ abo ašukancaŭ. I błokčejn i internet — technałohii pierš za ŭsio pra decentralizacyju. Śviet stanovicca ŭsio bolš składanym. SSSR nie paśpieŭ svoječasova «decentralizavacca» — i ciapier jość kłasnaja knižka Hajdara «Hibiel Impierii». Nastupnyja 20 hadoŭ abiacajuć być vielmi cikavymi.