«Padobna na mocny patok vady pad toŭščaj lodu»: KNDR i Paŭdniovaja Kareja pačali pieramovy na vysokim uzroŭni
U punkcie pieramovaŭ Pchanmundžom u paŭdniovaj častcy demilitaryzavanaj zony pačalisia pieramovy ab mahčymaściach palapšeńnia adnosin pamiž KNDR i Respublikaj Karejaj, pieradaje ahienctva «Renchap».
Delehacyju Paŭdniovaj Karei ŭznačaliŭ ministr pa spravach nacyjanalnaha abjadnańnia Respubliki Kareja Čo Mion Hiun, delehacyju KNDR uznačalvaje staršynia kamiteta KNDR pa mirnym abjadnańni radzimy Li Son Hvon.
Sustreča, pavodle dadzienych paŭdniovakarejskaha ministerstva abjadnańnia, pavinna była pačacca roŭna ŭ 10:00 pa miascovym časie. Ctaršynia Kamiteta pa mirnym abjadnańni Li Son Hvon pierad jaje pačatkam, jak piša Reuters, vykazaŭ aptymizm adnosna vynikaŭ hetych pieramovaŭ. «Dyjałoh projdzie dobra», — zajaviŭ jon žurnalistam pierad uvachodam u pieramoŭnuju. «Siońnia Paŭnočnaja i Paŭdniovaja Kareja buduć vieści razmovu z pazicyj surjoznaści i ščyraści», — dadaŭ jon.
Paźniej Li Son Hvon, jak zaŭvažaje Bi-bi-si, pacisnuŭ ruku ministru pa spravach nacyjanalnaha abjadnańnia RK Čo Mion Hiunu. Apošni pacikaviŭsia ŭ svajho kalehi, ci nie zrabili chałady jaho padarožža «niekamfortnym».
«Reki i hory pakrytyja śnieham i lodam, ale było b nie pierabolšańniem skazać, što mižkarejskija adnosiny jašče bolš zamarožanyja», - paryravaŭ kiraŭnik delehacyi KNDR, zaŭvažyŭšy taksama, što «hramadskaje imknieńnie» da adnaŭleńnia dyjałohu pamiž Pchieńjanam i Sieułam «padobna na mocny patok vady pad toŭščaj lodu».