Biełarusy ŭpieršyniu pieramahli na etapie «Dakara»
Lidar kamandy «MAZ-SPORTaŭta» Siarhiej Viazovič upieršyniu staŭ pieramožcam etapu rali-rejdu «Dakar». Jamu nie było roŭnych na 11-m śpiecučastku, jaki staŭ surjoznym vyprabavańniem dla mnohich ekipažaŭ.
Asablivy dla biełarusaŭ rali-zajezd byŭ z sumiesnym startam, kali na trasu adnačasova vyjechali matacykły, džypy i hruzaviki. Praciahłaść śpiecučastka skłała 280 km, uzdoŭž jakoha ekipažy čakali piasčanyja «pastki».
Siarhiej Viazovič startavaŭ u pieršaj piaciorcy razam ź jašče 4 hruzavikami, 10 matacykłami i 10 džypami. Asnoŭnaja niebiaśpieka była ŭ tym, što kali b niešta zdaryłasia, to dapamohi daviałosia b čakać niekalki hadzin.
Naprykancy zajezdu ekipaž daviedaŭsia, što «viazie» favarytu 3 chviliny, vyrašyŭ prybavić u tempie i apošnija 20 km jechaŭ na ŭsiu moc. Ryzyka akazałasia apraŭdanaj: biełarusy ŭpieršyniu ŭ svajoj historyi pieramahli na etapie «Dakara».
Śpiecučastak Siarhiej Viazovič pieraadoleŭ za 5 hadzin 14 chvilin. Uśled za im zaviaršyŭ etap arhienciniec Fiederyka Viłahra, jaki «pryvioz» biełarusam paŭtary chviliny. Treciaje miesca zaniaŭ rasijanin Dźmitryj Sotnikaŭ, jaki adstaŭ ad «čyrvonaha zubra» na 28 chvilin.
U ahulnym zaliku lidar biełaruskaj kamandy zajmaje treciaje miesca, zaŭvažna pavialičyŭšy adryŭ ad najbližejšych supiernikaŭ — ciapier jon składaje paŭtary hadziny. Napieradzie iduć tolki Eduard Nikałajeŭ na KamAZie, u jakoha na etapie złamaŭsia kardanny vał, i Fiederyka Vałahra na Iveco, jaki staŭ lidaram honki. Apošniamu biełarusy sastupajuć 3 hadziny 7 chvilin.
Biełaruskija honščyki ŭdzielničajuć u rali-rejdzie «Dakar» ŭ siomy raz. Uładalnikam kamandy vystupaje Minski aŭtazavod, techničnym partnioram — telekam-apieratar velcom. Asnoŭnaja meta — uvajści ŭ lik najmacniejšych ekipažaŭ pa vynikach rali ŭ zaliku hruzavikoŭ. Marafon u hetym hodzie prachodzić pa terytoryi troch krain — Pieru, Balivii i Arhienciny. Praciahłaść tolki chutkasnych učastkaŭ składaje 3,5 tys. km, pryčym bolšaja častka maršrutu prypadaje na vysakahorje. Zavieršycca honka 20 studzienia ŭ arhiencinskaj Kardobie.