Belarus Security Blog: Hipieraktyŭnaść pa prasoŭvańni idei «Minskaha pracesu» ŭ Kijevie i Vilni razhladajuć jak dziejańni ŭ intaresach Rasii
Čym dalej biełaruskija ŭłady prasoŭvajuć (naŭprost ci apasrodkavana) ideju «Minskaha pracesu», tym mienš palityčnaj adekvatnaści jany demanstrujuć. I tolki padsiłkoŭvajuć padazreńni ŭ hulni na karyść Maskvy, ličać aŭtary Belarus Security Blog.
Aficyjny Minsk imkniecca zamacavać i raźvić svoj adziny na hety momant zamiežnapalityčny aktyŭ — status pieramoŭnaj placoŭki. Paśla pośpiechu, źviazanaha ź minskimi pieramovami pa vajnie na Danbasie, biełaruskija ŭłady prystupili da raskrutki idei arhanizacyi hłabalnych pieramoŭ pa novaj architektury rehijanalnaj, ci navat šyrej — hłabalnaj, biaśpieki («Chielsinki-2», «Minski praces»).
Nieabchodnaść novaj sistemy mižnarodnaj biaśpieki vidavočnaja. I Biełaruś, pazbaŭlenaja źniešnich harantyj biaśpieki, zacikaŭlena ŭ stanaŭleńni takoj sistemy. A Minskija pahadnieńni pa Danbasie jak by stvarajuć pieradumovy dla taho, kab mienavita biełaruskaja placoŭka była abranaja ŭ jakaści pieramoŭnaj. Ale jość šmat «ale».
Praviadzieńnie padobnaha mierapryjemstva — vidavočny pryvilej. I zdolny pamnožyć simvaličny kapitał krainy-haspadyni. A značyć, źjaŭlajecca svojeasablivym padarunkam ad krain-udzielnic pieramovaŭ. Dla atrymańnia jakoha varta było b mieć roŭnyja i partniorskija adnosiny z asnoŭnymi ŭdzielnikami pieramoŭ. Pierśpiektyvy palityčnych adnosinaŭ Biełarusi z krainami Zachadu dahetul znachodziacca ŭ niapeŭnym stanie. A z Ukrainaj i Rasiejaj — paharšajucca.
Kraina-haspadynia pavinna vałodać adpaviednaj reputacyjaj, h.zn. być aŭtarytetnym i pavažanym členam mižnarodnaj supolnaści, prytrymlivacca samych vysokich pryncypaŭ u źniešniaj i ŭnutranaj palitycy. Reputacyja Biełarusi, na žal, - niedemakratyčny represiŭny režym, małapradkazalny, jaki ihnaruje pryniatyja na siabie mižnarodnyja abaviazacielstvy. Adzin fakt najaŭnaści śpiecdakładčyka AAN pa stanoviščy ŭ halinie pravoŭ čałavieka ŭ Biełarusi stavić pad pytańnie darečnaść ambicyj aficyjnaha Minska vystupić arhanizataram raspracoŭki novaha mižnarodnaha paradku.
Prymajučy bok pavinien vykonvać niejtralitet u supraćstajańni jak de-jure, tak i de-fakta. Biełaruś — sajuźnica adnaho z bakoŭ kanfliktu. Niepaśladoŭnaja, svojeasablivaja — ale sajuźnica. Pryčym aficyjny Minsk na ŭzroŭni rytoryki pry kožnym zručnym vypadku zajaŭlaje ab prychilnaści biełaruska-rasijskaha sajuza, asabliva ŭ vajennaj śfiery.
Kraina-haspadynia pavinna vałodać naležnym uzroŭniem davieru asnoŭnych udzielnikaŭ pieramovaŭ. Biełaruś usio čaściej čuje abvinavačvańni z boku Maskvy ŭ faktyčnaj zdradzie Rasii. A z boku Ukrainy paśla kožnaha antyŭkrainskaha hałasavańnia biełaruskich dypłamataŭ u AAN razdajucca ŭsio bolš žorstkija charaktarystyki na adras aficyjnaha Minska.
Urešcie, usie baki supraćstajańnia pavinny vykazvać zacikaŭlenaść (mahčyma, vymušana) dasiahnieńniem damoŭlenaściej. Ni Ukraina, ni Zachad nie majuć namieru damaŭlacca z Rasiejaj na rasiejskich umovach. U adroźnieńnie ad 70-ch hadoŭ minułaha stahodździa, Maskva nie vałodaje ni vahoj, ni ŭpłyvam, ni patencyjałam SSSR. I źjaŭlajecca, pa sutnaści, dehradujučaj rehijanalnaj dziaržavaj, jakaja sprabuje pravodzić palityku zvyšdziaržavy. Uzmacnieńnie žorstkaści amierykanskich sankcyj suprać Rasii źjaŭlajecca całkam vyraznym markieram stratehii Vašynhtona, nakiravanaj na izalacyju i «zadušeńnie» Rasiei. Jeŭrapiejcam, mahčyma, amierykanskaja pazicyja i nie padabajecca. Ale pryjarytetam palityki krain ES i NATA zastajecca padtrymańnie salidarnaści ŭnutry sajuzaŭ i ŭmacavańnie transatłantyčnaha partniorstva. Ni adna jeŭrapiejskaja stalica nie demanstruje surjoznaha sumnievu ŭ amierykanskaj palitycy ŭ adnosinach da Rasii.
Asobna treba vyłučyć pravakacyjnyja ŭkidy ab padrychtoŭcy Rasijaj anieksii / akupacyi Biełarusi. Z adnaho boku, padobnyja fantazii raspaŭsiudžvajucca z adabreńnia biełaruskich uładaŭ, jakija imknucca pastavić Zachad pierad vybaram: «Nie chočacie razmaŭlać z Łukašenkam, budziecie razmaŭlać z Pucinym». Z druhoha — insinuacyi ab rasiejskaj akupacyi Biełarusi z dnia na dzień prasoŭvajucca palityčnymi kołami susiednich krain. Jakija takim čynam spadziajucca padkreślić važnaść ułasnych krain dla biaśpieki Zachadu. Ale ŭ vyniku Biełaruś usprymajecca źniešnimi hulcami jak uraźlivaja, niaŭstojlivaja i niesamastojnaja kraina. Jakaja nie vałodaje palityčnaj subjektnaściu, ale vystupaje ŭ roli proksi macniejšaha hulca. U dadzienym vypadku — Rasii.
U Minsku nie razumiejuć hłybiniu niedavieru i nierazumieńnia pamiž zachodnimi krainami i Rasijaj. Niezdarovuju aktyŭnaść biełaruskich uładaŭ pa prasoŭvańni idei «Minskaha pracesu» jak minimum u Kijevie i ŭ Vilni razhladajuć jak dziejańni ŭ intaresach Rasii. Vynikam pahadnieńniaŭ u Chielsinki stała zamacavańnie zony ŭpłyvu i terytaryjalnych nabytkaŭ SSSR padčas Druhoj suśvietnaj vajny. A tamu i «Minski praces» usprymajecca jak sproba novaha padziełu kantynienta i zamacavańnia za Rasijaj niepasrednych (Krym) i ŭskosnych (Prydniastroŭje, Danbas, Abchazija, Paŭdniovaja Asiecija) terytaryjalnych nabytkaŭ. Ideja anieksii adnoj krainaj častki terytoryi druhoj krainy absalutna nieprymalnaja dla zachodnich elitaŭ. Pra što nieadnarazova i adkryta zajaŭlałasia. Ale čamuści ŭ Minsku hetaha nie čujuć.
Čym dalej biełaruskija ŭłady prasoŭvajuć (adkryta ci apasrodkavana) ideju «Minskaha pracesu», tym mienš palityčnaj adekvatnaści jany demanstrujuć. I tolki padsiłkoŭvajuć padazreńni ŭ hulni na karyść Moskvy.
Na žal, ahulnaja situacyja ŭ rehijonie nie pakidaje nadziei na chutkuju razradku i mahčymaść urehulavańnia supiarečnaściaŭ palityčnymi srodkami. Nichto nie hatovy iści na sastupki. A samo supraćstajańnie nabyvaje jarka vyražanaje ideałahičnaje, kaštoŭnasnaje adcieńnie pa miery taho, jak u Rasii zvužajecca pole svabody i množacca «duchoŭnyja skrepy». Biahučy kanflikt, biezumoŭna, budzie vyrašany. Ale zdarycca heta, pa-pieršaje, nie chutka. A pa-druhoje, praz projhryš Rasii.