Pieršy vypadak u sučasnaj historyi: dziejnaja kiraŭnica Novaj Ziełandyi čakaje dzicia
Upieršyniu ŭ sučasnaj historyi dziejnaja kiraŭnica dziaržavy padčas znachodžańnia na pasadzie narodzić pieršynca, paviedamlaje New Zealand Herald.
Džasinda Ardern abvieściła padčas vystupu na telebačańni, što jaje partnior — teležurnalist Kłark Hejfard — budzie «pieršym apiekunom» dziciaci, a sama jana praciahnie kiravać dziaržavaj.
Džasinda Ardern i Kłark Hejfard padčas teleintervju.
Jak padkreślivaje vydańnie, heta moža mieć značny ŭpłyŭ na navaziełandskaje hramadstva i raskład hiendarnych rolaŭ baćkoŭ u vychavańni dziaciej.
Raniej byli vypadki, kali žančyny-palityki naradžali dziaciej padčas znachodžańnia na vybarnych pasadach. Naprykład, aŭstralijskaja sienatarka Łarysa Uołtars navat karmiła svajo dzicia hrudźmi ŭ zali pasiadžeńniaŭ Aŭstralijskaha fiederalnaha parłamienta, a pakistanskaja premjer-ministarka Bienazir Bchuta naradziła svajo treciaje dzicia padčas kiravańnia dziaržavaj u 1990 hodzie. Ale Džasinda Ardern stanie pieršaj, chto narodzić dzicia biez adryvu ad vialikaj palityki.