Tut pačynaŭsia staražytny Miensk: haradzišča na Miency, źniataje z drona
Fota: Siarhiej Płytkievič, planetabelarus.by.
Haradzišča na Miency — miesca, dzie byŭ zasnavany Miensk, dzie horad mieściŭsia da 1084 hoda, kali jon byŭ spaleny kijeŭskimi kniaziami i pieraniesieny da ŭpadzieńnia Niamihi ŭ Śvisłač. Vyciahnutaja častka vałoŭ źleva — dziaciniec, samaja staraja častka haradzišča, niekatoryja archieołahi datujuć znachodki na joj ICH stahodździem. Źleva ad jaje ciače letapisnaja raka Mienka. Na viersie hetaha vała ŭ XIX stahodździ žychary Haradzišča, pany Piščały, pastavili pryhožuju biełuju altanku, adkul ahladali navakolnyja krajavidy. i ciapier z hetaha miesca možna dobra razhledzieć Malinaŭku — a heta 5—6 km naciańki.
Nižej vała ź Mienkaj złučajecca adziny prytok Mienki — ručaj Dunaj. Dunaj — samaja raspaŭsiudžanaja falkłornaja nazva raki ŭ Biełarusi. Kali śpiavali «oj, pajdu ŭ Dunaj utaplusia», to mieli na ŭvazie jakraz niejki taki, najbližejšy Dunaj. Tut, trochu vyšej za ŭpadzieńnie Dunaja ŭ Mienku, jašče ŭ XIX stahodździ stajaŭ vadziany młyn.
Uviersie, za vałami, bje krynica, jakuju Uładzimir Arłoŭ prapanavaŭ nazvać Krynicaj Usiasłava Čaradzieja. Bo hetaje miesca zapomniła i lehiendarnaha połackaha kniazia, i jahonaha syna Hleba Mienskaha, pieršaha mienskaha vaładara. Kali na vałach u XVIII stahodździ stajała siadziba Piščałaŭ, to da hetaj krynicy była zroblenaja admysłovaja leśvica, kab haspadary mahli chadzić brać vadu (vyšynia vałoŭ tam — bolš za 12 mietraŭ).
Jašče vyšej, na poli za zakruhlenymi drevami, a taksama na poli sprava ad vałoŭ mieścicca samaje vialikaje ŭ Biełarusi staražytnaje sielišča — bolš za 30 hiektaraŭ. Umacavanaje haradzišča i było centram hetaha sielišča, dzie ludzi trymali abaronu ŭ časie niebiaśpieki. Znachodki tam datujuć ažno V stahodździem.
Taksama sprava, nasuprać vyjezdu z vałoŭ, znojdzienyja mohiłki siaredziny XVI stahodździa (vioska zasnavanaja ŭ 1547 hodzie).
I ŭsio heta — pad samym Mienskam, 10 chvilin na mašynie ad mietro Malinaŭka abo 20 na maršrutcy ad mietro Piatroŭščyna.