U Minsku z-za šalonaha sabaki ŭvodziać karancin u troch rajonach
Karancin uvodzicca na dva miesiacy. Vieterynarnyja daktary ŭžo abychodziać kvatery i prapanujuć zrabić pryščepki žyviołam.
Śpiecyjalisty ŭžo detalova vyśvietlili, u jakich rajonach i z kim kantaktavaŭ šalony kanie-korsa. Nahadajem, 19 studzienia ŭ haradskoj vieterynarnaj łabaratoryi byŭ vyznačany dyjahnaz «šalenstva» ŭ sabaki, jakoha im napiaredadni pryvozili na kansultacyju.
— Z 23 studzienia ŭ troch rajonach Minska — Kastryčnickim, Frunzienskim i Maskoŭskim — uvodzicca karancin, — kamientujuć u Minskaj haradskoj vieterynarnaj stancyi. — Na čas karancinu žyviołam budzie zabaroniena naviedvać vystavy, a taksama zabaroniena pakidać miežy rajona, horada. Heta značyć, niekatoryja žyvioły buduć nievyjaznymi. Usia infarmacyja, kamu možna vyjazdžać, a kamu — nie, budzie znachodzicca ŭ dziaržaŭnych vieterynarnych klinikach pa miescy žycharstva ŭładalnika.
U Minskaj haradskoj vieterynarnaj stancyi adznačajuć: ich supracoŭniki ŭžo abychodziać kvatery, jakija znachodziacca u hetych rajonach, i prapanujuć haspadaram zrabić pryščepki. Ale «ludzi nieachvotna adčyniajuć dźviery i nie dajuć žyvioł vakcynavać».
— Na dadzieny momant šmatlikija žyvioły nie vakcynavanyja, nie čypiravanyja, — kažuć u vietstancyi. - My rasklejvajem abjavy z tłumačeńniem, što ŭ rajonie znachodzicca ačah šalenstva, prosim zrabić pryščepku. Ludzi viedajuć heta, ale ničoha nie robiać.
Śpiecyjalisty rajać pryščaplać žyviołu raz u hod. Prablema tyčycca nie tolki haspadaroŭ sabak, ale i haspadaroŭ inšych žyvioł. Nieviadoma, kaho moh pakusać, padrapać i aśluniavić šalony kanie-korsa, pakul byŭ biez nahladu. Užo viadoma, što sabaka naradziŭsia ŭ kastryčniku 2015 hoda i da studzienia 2018 hoda žyŭ na vulicy Minina ŭ siamji, dzie troje maleńkich dziaciej. Darečy, na hetaj ža vulicy znachodzicca haradskaja vietstancyju. Śpiecyjalisty znajšli pašpart kanie-korsa, ale z ulikam taho, što hadavaniec nie byŭ čypavany, nielha skazać, što heta sapraŭdy jaho pašpart.
6 studzienia 2018 hoda ŭładalniki pradali sabaku, kažuć, ź im usio było dobra, nie było nijakich padazreńniaŭ na šalenstva. Novy haspadar zapeŭnivaŭ, što kuplaje hadavanca dla siabie, ale tut ža jaho pierapradaŭ u Frunzienski rajon. Pa adnoj ź viersij, sabaku treci, i apošni, haspadar pavioz u Minski rajon, pa inšaj — kanie-korsa na novaje miesca žycharstva nie dajechaŭ. Sprava ŭ tym, što apošniaja haspadynia błytajecca ŭ pakazańniach i dakładna nie moža skazać, dzie znachodziŭsia sabaka. Pa słovach žančyny, svajaki byli suprać chatniaj žyvioły, tamu jana 7 studzienia vykinuła kanie-korsa ŭ namordniku ŭ rajonie vulicy Kižavatava.
11 studzienia sabaku padabrali vałanciory. Z 11 pa 13 studzienia jon byŭ na pieratrymcy ŭ adnoj siamji, z 13 pa 17 studzienia — u druhoj. Apošnija ŭładalniki zaŭvažyli, što z hadavancam niešta nie tak, i pryvieźli jaho na kansultacyju ŭ Minskuju haradskuju vieterynarnuju stancyju.
— U sabaki ŭžo była niervovaja forma, sutarhi, i naš doktar skazaŭ advieźci jaho na karancin u hadavalnik na Hurskaha. Ale jaho nie davieźli, sabaka pamior, paśla čaho jaho addali na abśledavańnie ŭ haradskuju łabaratoryju, i 19 studzienia byŭ dadzieny vynik — u kanie-korsa vyjaŭlena šalenstva, — raspaviadajuć u Minskaj haradskoj vieterynarnaj stancyi.
***