Kitajcy vyraścili dzieciam novyja vušy ź ich ułasnych kletak FOTA
Miedyki ŭ Kitai vyraścili piaciom dzieciam ź niedaraźvitaj vušnoj rakavinaj novyja vušy, vykarystoŭvačy ich ułasnyja kletki. Vušnyja rakaviny farmavali ź bijadehradujemaha materyjału, a zatym zasialali kletkami chrastka. Vyniki ekśpierymienta apublikavanyja ŭ časopisie EBioMedicine.
Pryrodžanaja niedaraźvitaść vušnoje rakaviny (mikratyja) sustrakajecca, u zaležnaści ad rehijona, z častatoj ad 1 da 17 vypadkaŭ na 10 tysiač dziaciej. Hetaja asablivaść nie tolki stvaraje niazručnaści ŭ žyćci — naprykład, takija ludzi nie mohuć nasić akulary, — jana moža surjozna parušyć słych i niehatyŭna paŭpłyvać na samaacenku ŭ dziciačym uzroście. Zvyčajna prablema vyrašajecca z vykarystańniem vušnych pratezaŭ z palimiernych materyjałaŭ, ale takija vušy nie funkcyjanalnyja ŭ jakaści orhanaŭ słychu.
Užo ŭ 1997 hodzie daśledčyki pakazali, što čałaviečaje vucha možna paśpiachova vyraścić z kletak chrastka ŭ arhaniźmie myšy. Z tych časoŭ takaja mahčymaść była nieadnarazova paćvierdžanaja na žyviołach, ale da prymianieńnia na ludziach sprava nie dachodziła. I voś, narešcie navukoŭcy zrabili novy krok.
Miedyki źniali źlepki zdarovych vušej u dziaciej z adnabakovaj mikratyjaj i nadrukavali na 3D-pryntary ich adlustravanyja kopii z dapamohaj śpiecyjalnych rečyvaŭ. Potym u pacyjentaŭ brali bijapsiju vušnoha chrastka, vyłučali kletki chrastkovaje tkanki i zasialali imi nadrukavanyja matrycy.
Vyroščvańnie vušnoj rakaviny zajmała try miesiacy, paśla čaho orhan pierasadžvali pacyjentu z zachavańniem vušnoha kanała.
Praces pierasadki vucha
U nižnim radku pakazany stan vucha adnaho z pacyjentaŭ praz 1, 6, 9, 12, 24 i 30 miesiacaŭ paśla apieracyi
Ekśpierty śćviardžajuć, što ab poŭnym pośpiechu vyprabavańniaŭ kazać možna budzie jašče praź niekalki hadoŭ, kali pacyjenty padrastuć. A zaraz razhladajecca mahčymaść całkam pierajści na 3D-druk vušnych rakavin. Dla hetaha treba vykarystoŭvać kletki tkanak u jakaści «zapraŭki» dla pryntara.