Dźviuch aktorak nie ŭpuścili ŭ Biełaruś
Jany lacieli na zaprašeńnie «Svabodnaha teatra», 5 kastryčnika byli zatrymanyja ŭ aeraporcie «Miensk‑2».
Amierykanskaja aktorka i śpiavačka Stefani Pan i aŭstralijskaja aktorka Ester Muhambi, jakija prylacieli ŭ Biełaruś na zaprašeńnie biełaruskaha «Svabodnaha teatra», 5 kastryčnika byli zatrymanyja ŭ aeraporcie «Miensk‑2». Biełaruskija pamiežniki paviedamili aktorkam, što jany znachodziacca ŭ śpisach nieŭjazdnych u krainu.
Cikava, što aktorki, jakija prylacieli ŭ Miensk z Amsterdama (praz Prahu), raniej ni razu nie naviedvali Biełaruś. Supracoŭniki mienskaha aeraporta nie paviedamlajuć aktorkam pryčynu zabarony na ŭjezd u krainu, spasyłajučysia na toje, što heta «kanfidencyjnaja infarmacyja Ministerstva zamiežnych spravaŭ RB».
Stefani Pan i Ester Muhambi pavinny byli na praciahu tydnia repietavać śpiektakli biełaruskaha «Svabodnaha teatra» u miežach prajektu Eurepica. Ź Miensku aktorki źbiralisia vylacieć tolki praz tydzień, 12 kastryčnika.
Pamiežniki paviedamili Stefani Pan i Ester Muhambi, što im pryjdziecca pravieści ŭ mienskim aeraporcie dva dni. Nazad jany mohuć adlacieć tolki za svoj košt, a kvitki ŭ dziaŭčataŭ jość tolki na rejs Miensk‑Praha‑Amsterdam, jaki ŭ nastupny raz budzie praz dva dni.
Aktorak raźmieścili ŭ aeraporcie ŭ pamiaškańniach turemnaha typu, tak zvanych pakojach dla zatrymanych pieramieščanych asobaŭ. Ich svaboda abmiežavanaja, jany zamknutyja.